Ang tabang ni Lola

Gula 7

“Dili nako igsapayan ang kakuyaw nga akong atubangon Mar basta kay maangkon ko lang ang imong gugma,” giingnan ni Ruben si Maricor.

Bisan og may pagka-ngitngit ang ilang nahimutangan kay gipawong man nila ang suga sa sala, apan nasiguro ni Ruben nga nagtutok kaniya si Maricor. “I love you Mar,” ni Ruben pa sa hinay’ng tingog samtang gigunitan niya ang bukton sa dalaga.

Wala motubag si Maricor apan mibawos ang dalaga sa paggunit sa bukton ni Ruben. “Nahadlok gayod ko Ben nga dunay kagubot nga mahitabo kun masayran ni Siegfred nga may relasyon na kitang duha,” may kabalaka ang tuno sa tingog ni Maricor.

“Gisugot na ba ko nimo Mar?” gisukna ni Ruben ang dalaga. “Sige, sweethearts na ta. Gamhanan kaayo ka’g backer kay si Lola g’yud,” matud ni Maricor. Diha-diha nga gipatikan dayon ni Ruben og kiss si Maricor diha sa iyang aping. Tam-is kaayo ang ilang pagparayganay taliwala sa kangiob sa ilang nahimutangan.

Dugay sila nga nangatulog kay daw naglumpayat sa kalipay ang kasing-kasing sa ulitawo nga gisugot siya ni Maricor. Buntag na si Ruben nga mipauli. Apan pagawas niya sa balay nila ni Maricor, nakita niya ang usa ka lalaki.

Nakahimungawong si Ruben nga ang lalaki mao si Siegfred. Gikulbaan siya apan diha-diha nga nabalikan si Ruben sa iyang kaisog. Giduol si Ruben ni Siegfred ug gikalitan og sukmag.

Abtik nga nakatapi si Ruben sa kinumo ni Siegfred nga diriyot gani mahisukamod tungod sa kalit nga paghupo sa ulitawo. Walay nahimo si Ruben gawas sa pagsukol.

Daghang mga tawo ang midugok kanila ug mao nga nakadapit kini sa pagtagad nila ni Maricor nga didto sulod sa balay. Bisan og maayo manuntok si Ruben, apan nakaigo gihapon si Siegfred kaniya.

“Hunonga na ninyo ang away! Siegfred! Ruben!” nadungog sa duha ang singgit gikan kang Maricor.

Mituman ang duha sa awhag sa dalaga. Gitabangan og gunit si Siegfred sa mga tanod nga miresponde sa kagubot. Gidala sila sa duol nga barangay hall ug giimbistigar.

“Ayaw na ko og samoka pa Siegfred. Makigbuwag na ko nimo ug si Ruben na ang akong tugyanan sa akong gugma,” matud ni Maricor. Wala sila magtoo nga nakahilak ang tigas kaayo nga si Siegfred.

“Sige, kun maoy imong kagustohan Maricor, dili na ko manghilabot pa nimo. Dili nako ipamugos ang akong kaugalingon,” ni Siegfred pa nga nagpamahid sa iyang mga luha.

“Congrats Brod. Dili na ko manghilabot pa nimo basta ayaw binuangi si Maricor,” matud ni Siegfred dayong biya sa barangay hall. (Kataposan)