Duha ka dagway sa usa ka tawo

Gula 17

Iniglakaw ni papa, pasudlon dayon ni Mama ang iyang kabit. Sa sulod mismo sa lawak nila ni papa buhata nila ni mama ug sa kabit niini ang paghugaw-hugaw sa ilang kaminyoon. Hangtod nga usa ka higayon niana, sayong mipauli si papa kay naglain ang lawas. Naabtan niya si mama ug ang kabit niini sulod sa ilang lawak. Tungod ba kaha sa gibating kalagot, gipusil ni Papa si Mama ug ang kabit niini. Napatay ni Papa ang duha ka mabudhion pero nabilanggo usab siya kay nangusog man ang tubigtubigan nga kabanay sa kabit ni mama sa pagpabilanggo kaniya.”

“Luoy usab diay ang imong kaagi.”

“Tinuod kana. Tungod kay wala man kami mga kabanay dinhi sa Sugbo kay taga Mindanao man ang among kaliwat, gisagop ko ni Padre Miguel nga maoy kura paruko sa Consolacion niadtong tungora. Siya nay nagpa-eskuyla nako. Hangtod nga gihimo ko niyang sakristan. Kauban ko niya sa tanan niyang mga lakaw.”

“Daan pa lagi gyud ko...”

“S-sa unsa?”

“Nakita ko na ikaw sa una. Taga Consolacion man ko. Bantog ra nga ingon sa sinati na nako ang imong panagway. -- Sumpayan pa