Duha ka dagway sa usa ka tawo

Gula 16

Pipila lang ka buwan human sa kamatayon ni Papa, si Noy Berto mitipon na pagpuyo sa among balay. Supak sa akong kabubut-on ang pagpuyo ni Noy Berto sa amo apan wala koy nahimo kay kagustohan man kini ni Mama.

Inanay ko na lang untang gitun-an ang akong kaugalingon pagdawat kaniya isip akong ama-ama. Apan salbahis siya. Usa ka higayon niana nga wala si Mama sa balay, iya kong gilugos. Ang nakapait pa gyud kay wala motuo si mama nako sa dihang ako siyang gitug-anan bahin sa gibuhat ni Noy Berto nako.

Tungod sa akong kahiubos, milayas ko gikan sa amo ug mianhi sa siyudad. Dinhi ko nakakat-on sa pagbaligya sa akong unod.”

“Managsama diay kitang nakabaton og inahan nga wala’y puangod.”

“U-unsay buot mong ipasabot?”

“Nagbudhi usab ang akong inahan ngadto sa akong amahan. Usa lang ka security guard ang akong amahan. Magabii ang iyang duty ug kaadlawon na siyang mopauli sa among gipuy-an. Wala lang siya’y kasayoran nga nagluib si mama sa ilang kaminyoon. Apan ako, bisan sa kalinghod pa sa akong kabuot niadtong panahona, nakasabot na sa gihimo ni Mama. -- Sumpayan pa