Gula 15
Wala na motubay si Claire sa ulahing gisulti ni Ryan.
“Ikaw,” ni Ryan pa. “Nganong ingon man niini ang matang sa trabaho nga imong gisudlan?”
“Wa koy laing nakamaohan gawas niining maong trabaho,” laktod niyang tubag.“Kuwang ko sa edukasyon. Igo ra kong nakahuman sa unang ang-ang sa hayiskol.”
“Nganong wa ka man motiwas og eskuyla?”
“Sayo kong nailo sa amahan. Namatay si Papa sa nag-edad pa ko’g dose. Human sa iyang kamatayon, ingon sa nawad-an na og direksiyon ang akong kinabuhi.”
“Ang imo diay’ng inahan?”
“Wa siya’y silbi. Wa siya’y gihimong maayo sa akong kinabuhi.”
“Nganong nakasulti ka man og ingon niana?”
“Usa ka seaman ang akong amahan. Sulod sa tulo ka tuig, kausa ra siya mokanaog sa barko nga iyang gisakyan. Samtang nanakay si papa sa barko, si mama nagdula usab sa kalayo. Saksi ko sa pagbudhi ni mama sa kaminyoon nila ni Papa. Nakigrelasyon siya ni Noy Berto. Dihang naabtan og bagyo sa China Sea ang barko nga gisakyan ni papa, nalunod kini ug naapil siya sa listahan sa mga tripulante nga nangamatay. -- Sumpayan pa