Niining gabhiona nagpahigayon og contest sa kanta ang mga organizer sa fiesta. Diin ang mga tawo nga nanan-aw maoy pahukmon. Kinsa kadtong daghang mga tawo nga mamarog igkanta sa usa ka contestant, kana siya maoy modaug.
Adunay capacity nga usa ka gatus ka lingkoranan alang niadtong mga tawo nga manan-aw sa maong contest ug adunay usa ka stage alang niadtong mga apil sa maong contest.
Ang mga contestants pwedeng mogamit sa ilang mga minus one tape, videoke, sista, keyboard ug uban pa. Pwedeng sila ray moduyog sa ilang mga tulonggon ug pwede ra pod magdala’g tigduloyog.
Kining maong contest, instant ug wa ipaagi’g audition. Kinsa kadtong buot moapil magpalista lang sa committee. Napu ka contestants ang ilang gikinahanglan. Ang mga premyo P3,000 alang sa 1st prize, P2,000 sa 2nd prize ug P1,000 sa 3rd prize.
Tuod man gisugdan dayon ang maong contests nga nakapalingaw sa tanan. Dihay usa ka tiguwang mikanta’g “Don’t be cruel” ni Elvis Presley gamit iyang videoke nga maayo kaayong moikid-ikid sa iyang lubot, kiay-kiay sa iyang tiil ug labyog-labyog sa iyang kamot.
Diha say dalaga nga mikanta sa sikat nga awit karon sa Amerika nga “Price Tag”.
Dihay mikanta sa awit ni Michael Jackson, “Guns n’ Roces,” Max Surban ug Yoyoy Villame. Apan wala gyuy nakapabarug sa tanang mga tawo.
Samot na dihang gitawag si Luciana, nga maoy katapusang mokanta ning maong contest. Nanglingkod ang tanan ug namahuway.
Inila man gud kini si Luciana nga usa ka kuwag pangisip. Sugosugoon og labay’g basura, panilhig ug uban pa sa mga tawo diring dapita. Suholan lang nila’g sinsiyo kay alang nila yabag si Luciana. Yabag ang pangisip.
“Kanta na Luciana!” matud sa announcer.
Atubangan sa mga nanan-aw nga mga tawo mibarug sa tunga-tunga sa entablado si Luciana ug mi-position og stand-straight. Gikuptan niya ang microphone sa iyang walang kamot ug ang iyang tuong kamot gitapion niya sa iyang dughan. Mihilom sila. Mitutok kang Luciana.
“Bayang magiliw....” Mikanta si Luciana. Kuha kaayo niya ang mga nota ug tempo nga martsa sa Lupang Hinirang nga kanta nga nakalimtan pagkanta ganina sa wa pa sugdi kining maong contest. Way nahimo ang tanang mga tawo nga nanan-away kun di ang pagbarug. Mibarug sila pagkadungog sa awit ni Luciana sa Pambansang Awit ng Pilipinas.
“And the winner is Luciana!” matud sa announcer. (Katapusan)