Am-aman dayon

Dear Tita Salie,

Maayong adlaw. Tagoa lang ko sa pangalan nga Mercy, ug duna koy kapuyo nga maoy naghatag nako niining suliran nga maoy kanunay makapaguba sa akong adlaw.

Tawga lang og Lyndon ang akong live-in partner. Nagproblema gyud ko niining tawhana kay sobra kaayo kahimabaye. Kadaghan na gyud nahitabo nga akong mabasahan sa iyang celfon ang mga texts sa iyang mga babaye.

Tungod kay masuko man ko kay siyempre bation gyud ko og kalagot hinungdan nga maglalis gyud mi tungod niini. Unya kun mangaway nako niya iya dayon ko nga palayason. Kanunay lang ko nga maghilak sa akong kahimtang, Tita, kanunay lang gyud ko niyang pasakitan. Mao nga usahay kun iya kong palayason ako gayod nga buhaton. Apan kun magsugod nako og panghipos sa akong mga gamit aron molayas dali ra pud kaayo siya makapangayo og pasaylo. Iya dayon ko nga am-aman aron dili molakaw.

Matud niya nga lingawlingaw ra ang iyang pagsige og text sa mga babaye ug misaad siya nga dili na mousab. Apan karong bag-ohay lang ako na sad siyang nasakpan nga nibalik na pud siya sa iyang kabuang. Naglibog nako, Tita, kun unsay akong buhaton. Love pa kaha ko niya nga dili man siya mopatuo nako? Palihog pasabta ko. Thank you very much and God bless. -- Mercy

* * *

Dear Mercy,

Nakaila na pag-ayo ang imong bana kanimo nga madala ka lang niya og am-am mao nga kaya ra niyang buhaton pag-usab ang iyang gibuhat kaniadto. Nasayod siya nga buotan kaayo ka ug andam mupasaylo mao kana nga nag-abusar ang imong bana.

Tingali kun nagkinahanglan og heart to heart nga estorya ang imong bana. Pasabta siya nga muabot ang panahon nga mapuno ka ug tingali unya kundili kana makadawat kaniya.

Pinaagi sa imong kalmado ug mabugnaw nga tingog pasabta siya nga makaguba sa inyong pagpuyo ang iyang gibuhat. Hatagi pa siya og chance ug ingna siya nga kun buhaton pa niya pag-usab usa lang ang buot ipasabot niini nga andam na siyang makigbulag kanimo.

From time to time imo siyang i-surprise, i-check ang iyang cellphone. Imo lamang ipakita kaniya nga seryoso gyod ka sa imong gisulti kaniya. Imong ipa-feel niya nga dili kana puydeng am-aman pa.

Samtang imo kining gibuhat imo usab nga buhion pagbalik ang inyong ka-close ug ka-sweet dihang manag-uyab pa lamang kamo. Imong pangitaan kanunay og paagi nga aduna kamo’y alang kaninyong duha lamang aron dili na siya makahunahuna nga maglingawlingaw pa pinaagi sa text. -- Tita Salie