Duha ka dagway sa usa ka tawo

Gula 13

“Ngano bang nakapangutana ka man niana?” Gikan ni Ryan.

“Wala lang,” gikaluhaan og pahiyom ang iyang tubag “Kalit man lang gud misantop sa akong hunahuna nga mora’g ikaw si Jesus ug ako mora’g si Magdalena.”

“Ayaw itandi si Jesus ngadto ni bisan kinsa tungod kay wala’y usa nga sama kaniya dinhi sa kalibotan. Bisan tuod kun nagpakatawo siya apan dili siya makahimo’g sala tungod kay Anak siya sa Diyos.”

“Maayo man diay kang mowali.”

Nahilom si Ryan. Miduko kini sa iyang atubangan. May diyotay’ng panglipaghong nga milibagha sa nawong niini.

“Pila na ka babaye ang imong natilawan?” Sukit ni Claire.

“Daghan na,” tubag ni Ryan. “Kun iapil ang akong girlfriend sa wala pa ko mahimong pari, dili na tingali maihap sa mga tudlo sa mga kamot ug tiil.”

“Grabeha sab nimo, uy.” -- Sumpayan pa