Ang tabang ni Lola

Nagpaingon si Ruben sa Cebu City Treasurer’s Office aron molukat og residence certificate kay gamiton niya kini sa Deed of Sale sa palitonon niya nga kotse.

Nasundan ni Ruben ang usa ka tiguwang nga hinay na kaayo molakaw ug giagak kini og batan-ong babaye. Nasabtan ni Ruben nga ang tiguwang usa sa mga senior citizen nga mokubra sa iyang cash incentive sa City Hall.

Wala dayon makaagi si Ruben sa gamay nga agianan kilid sa City Hall annex building kay kun mopugos siya pag-una’g lakaw, hayan nga mabag-iran niya ang tiguwang babaye.

Apan kalit lang nalukapa si Lola. Nakalitan si Ruben kay diha man gayud siya sa luyo niini ug abtik niya kini nga gitabangan aron nga makabarog pagbalik ang tiguwang.

Gitabangan nila ni Ruben ug sa batan-ong babaye nga makatindog ang tiguwang. “Naunsa man kadto siya day?” gipangutana ni Ruben ang babaye nga kauban sa tiguwang.

“Nakabuhi ang iyang kamot nga migunit sa akong bukton mao kadto nga nalukapa siya. Gihilantan man gud kini si Lola apan miari lang gayud mi aron makobra ang P3,000 niya nga cash incentive aron ipalit namo’g tambal,” matud sa batan-on.

Naalinggatan ni Ruben nga maanyag ang babaye nga kauban sa tiguwang. “Sige kay nakatindog na man kana si Lola, mouna lang ko ninyo ha?” giingnan ni Ruben ang tiguwang ug ang iyang kauban.

Igo lang mipahiyom ang tiguwang nga sa tan-aw ni Ruben may pagka luyahon ang panglawas. Didto sa treasurer’s office, nagpaabot makadiyot si Ruben kay wala pa ang tig-isyu sa sedula.

Milingkod usa siya kay may bakante man nga lingkoranan. Taud-taud, miabot kadtong tiguwang ug ang batan-ong babaye nga nag-agak niini. Wala nay kalingkoran sa maong tiguwang mao nga nagtindog na lang kini sa daplin. Mitindog si Ruben ug gibutang ang iyang dala nga laptop bag sa lingkoranan aron dili kini lingkoran og lain. Giduol niya ang batan-ong babaye ug ang tiguwang. “Atong palingkoron si Lola didto sa akong gilingkoran,” giingnan ni Ruben ang babaye.

Gitabangan og agak ni Ruben ang tiguwang paingon sa lingkoranan. “Diha lingkod Lola samtang maghuwat ka nga maasikaso ang imong kobrahonon.”

“Unsaon pag-process sa cash incentive?” matud sa batan-ong babaye ngadto kang Ruben. Nakahukom si Ruben nga iyang tabangan ang babaye nga mapadali ang pagkobra sa cash incentive para sa tiguwang. (Sumpayan)