Gula 7
Pirmi lang tawon naglaway si Miguel sa hamis kaayong paa ni Wenna kay ang dalaga miklaro nga maglikay na siya nga dili mabiktima pag-usab sa pasalig.
“Magpakasal na lang ta Wen kay halos mamatay na ko sa kaibog nga magtan-aw sa imong paa kun magsul-ob ka’g short pants. Igo lang ko nimo nga tugotan nga makahapuhap,” ni Miguel pa nga nagpahiyom.
Kutob ra gayud sa gakus ug hawok si Miguel ngadto kang Wenna. Dili gayud magpahikap si Wenna sa labing pribadong parte sa iyang lawas.
Bisan og pagbut-an ra ni Wenna nga moparayeg si Miguel kaniya apan gikuwangan ang ulitawo. Nalipay si Miguel kay misugot si Wenna nga magpakasal na sila. Tuod, dali ra nga natakda ang ilang kasal.
Sa adlaw sa ilang kasal, malipayon kaayo ang bag-ong magtiayon, apan labaw na gayud si Miguel nga naghinam-hinam nga mopaspas unta pagtuyok ang kalibutan aron moabut na ang kagabhion.
Pagka-gabii na. “Tam-is kaayo handumon ang atong unang panagkita Wen,” matud ni Miguel samtang nagtupad sila sa paghigda. “Ngano man kuno bi?” paraygon kaayo ang tingog ni Wenna.
“Una, gikan ko niadto nga nag-lunch ug nakita ko ikaw nga nagdanga-danga sa akong nahimutangan nga nag-short pants. Wala ko makasabot sa akong gibati nga nagsud-ong sa hamis kaayo nimong paa,” matud ni Miguel nga nagngisi samtang nagsigi og hapuhap sa paa ni Wenna.
“Yuna, duna ko’y giandam nga gift para nimo Migz,” ni Wenna pa nga miabli sa iyang aparador. Gitunol dayon niya sa iyang bana ang iyang gift nga nindot kaayo pagkaputos.
Gibuksan kini ni Miguel. Nahingangha si Miguel pagkakita sa plastik bag nga nalangkat ang gunitanan. “Unsa gud ning imong gift Wen?” nagngisi si Miguel.
“Importante kaayo kanang maong bag sa atong relasyon kay kun wala pa maputol ang maong bag, dili kita magkaila Migz,” ni Wenna pa. Pareho silang duha nga nahakatawa.
Misunod ang pagparayganay sa bag-ong magtiayon. Gitagbaw ni Miguel ang iyang kaugalingon sa pagparayeg sa iyang asawa. Asawa nga bisan og may anak na apan nagpabilin nga mora’g dalaga.
“I love you, Wennn,” matud ni Miguel nga miarangkada sa pagparayeg sa asawa. “Isaad usab nako nimo Migz nga ikaw ray akong mahalon hangtud sa hangtud,” matud ni Wenna.
Dayon nahilom ang tibook lawak sa bag-ong magtiayon. (Kataposan)