Gabuk nga bag

Gula 6

“Gusto unta nako nga magpirmi na ang mapinanggaon mo nga pagtagad nako Wen. Mahimo lang kini kun ako ka na nga sweetheart,” ni Miguel pa nga nagpahiyom. Wala motingog si Wenna.

Gipabantayan ni Wenna sa iyang manghod ang tindahan ug mipaingon sila si Miguel sa balay sa dalaga nga dili layo niini. “Maayo baya ang atong negosyo. Sa duha ka buwan lang, miganansya ta og kapin sa trayenta mil,” matud ni Wenna.

   “Dili pa kana mao Wen. Kun mahibalo na ang katawhan dinhi sa inyong sitio nga barato ra ang presyo sa atong mga baligya kompara sa uban, anhi na sila mamalit sa atong tindahan. Dugangan nato ang atong mga baligya,” ni Miguel pa.

Nagdungan sila pagpangaon. Giandaman gayud tinuod ni Wenna og lamian nga pagkaon si Miguel. “Special ka nga guest nako Miguel. Tungod kanimo nakakita ko og kahayag sa akong kaugmaon,” matud ni Wenna.

Wala makasabot si Miguel sa gisulti sa dalaga. “Unsay buot mo nga ipasabot Wen?” gisukna ni Miguel ang dalaga. “Gidawat na nako ang imong gugma Migs. Pinaagi kanimo, nalantawan nako ang akong maayong kaugmaon,” ni Wenna pa nga migunit sa bukton sa ulitawo.

“Wenna!” Napasinggit si Miguel ug wala makapugong nga nagakus niya ang dalaga sa kalipay. “I love you Wenna. I love you too Migs.” Tam-is kaayo ang gugma sa ikaduha nga higayon alang kang Wenna. “Ako’y mangamahan sa imong tres-anyos nga anak Wen. Gusto ko nga dili ta magdugay-dugay, magpakasal dayon ta,” matud ni Miguel.

Gidugangan ni Miguel ang pagpangompra og mga baligya alang sa tindahan. Kompleto sila sa mga lainlaing matang sa softdrinks, may baligya sila nga bugas, apil na gani ang LPG nga kusog kaayo sa ilang mga silingan.

Suod ni Miguel ang distributor sa LPG mao nga gihatagan siya og presyo nga susama sa dealer. Dali ra kaayo nga miasenso ang ilang tindahan. Gikan sa trabaho, mideritso na usab si Miguel paghapit sa tindahan ni Wenna.

Napasiga ang iyang mga mata pagkakita sa karatola sa tindahan nga nahimo na nga Wenmigz Store. “Giaprobahan na sa DTI ang giaplay nako nga ngalan sa atong tindahan Migs. Gisurpresa nako kini kanimo,” ni Wenna pa.

Mapinanggaong gisud-ong ni Miguel si Wenna gikan sa ulo ngadto na sa bitiis. Daw natulala siya nga nagsud-ong sa dalaga nga nagsul-ob na usab og short pants. (Sumpayan)