Ang Lanao sa pag-adto ni Rommel

Taga dakbayan sa Sugbo si Rommel nakaadto siya sa lalawigan sa Lanao Norte tungod sa agni kaniya sa iyang higala nga usa ka Muslim. Gaduha-duha man gani siya pag-adto tungod sa gisulti sa iyang higala

didto sa Sugbo nga dili maayo ang pag-adto didto kong ang imong kauban usa ka Muslim.

Ang mga Muslim kuno, matud pa sa iyang higala, dili masaligan. Hinuon, dili ang tanan. Pero nagsalig si Romel sa iyang higala nga Maranao.

“Salig lang kanako, Bay Rommel. Didto sa among dapit dili ka maunsa. Walay mohilabot kanimo,” pulong sa iyang higala nga ang ngalan si Marsanga.

“Mamatay ang tawo nga mopasipala kanimo.”

Hinuon, nagsalig gayod si Rommel sa iyang higala tungod sa ilang panag-uban didto sa Sugbo. Unsay ilang makaon didto sa Sugbo, ilang bahinon, gawas lang sa karneng baboy nga dili gayod kan-on ni Marsanga.

Didto sa dapit nilang Marsanga, nalingaw si Rommel ug tungod kaha nga aduna siyay pagka guwapo nga pagka lalaki, daghang mga higala ni Marsanga labi na kadtong mga babaye ang gibati og kaibog kaniya. Namatikdan kini sa mga lalaking Maranao. Kini man god ang mga Maranao, masuko sila kong dunay lalaki nga mahigugma sa babaye ilabi na kong usa ka Kristiyano ang mahigugma.

Tungod niini, nahitabo ang panagsumpaki.

“Bay, maayo pang mopauli ka sa inyo,” matud sa lalaking Maranao ngadto kang Rommel.

“Unsa man ang akong sala,” pangutana ni Rommel. “Nganong masuko man kamo.”

Maayo na lang kay miabot si Marsanga mao ang nagpugong sa pinahong kagubot.

“Ayaw’g hilabti ang akong higala. Maayo pa kong ako ang inyong pasakitan apan nungka nga siya,” matud ni Marsanga. “Bisita ko siya busa ayaw ninyog hilabti.”

Maayo nalang gani kay dihay usa ka barangay Kagawad nga mao ang mitabang kang Marsanga aron dili gayod mahitabo ang kagubot.

“Mao man lagi kitang uban nga Maranao. Dili maayo nga pasakitan ang atong bisita gawas lang kong dunay iyang gibuhat nga daotan,” pulong sa Barangay Kagawad. “Maghiusa kitang tanan isip mga Pilipino.”

Hinuon, mitambag kadtong kagawad nga maayo tingali nga mopaul si Rommel didto sa Sugbo kay nahadlok mang kagawad nga inigkagabii, initan si Rommel.

Mao kadto ang unang paghisusoy ni Rommel sa lalawigan sa Lanao. Para kaniya, dilikado gihapon ang maong dapit nila ni Marsanga para sa mga Kristiyano nga dili mailhan. Hinuon, nagpasalamat gihapon si Rommel sa iyang higala nga ni Marsanga nga kong dili pa tungod kaniya, dili siya makaadto ug makasuroy sa dapit sa mga Maranao.

“Charge to experience,” matud ni Rommel sa iyang pagbalik sa Sugbo. (Kataposan)