Gabuk nga bag - Gula 3

"Dihang nabiktima ko sa akong boyfriend nga aduna usab diay laing babaye, wala ko magpakawala sa paglaum mao nga nagtinda-tinda ko og mga pagkaon diha sa tindahan nako sa eskena," gisaysay ni Wenna kang Miguel ang iyang kaagi.

Igo lang miyango-yango si Miguel ug gitutokan niya si Wenna. Bisan pa og may anak na si Wenna apan ang iyang lawas mora gihapon og dalaga nga wala mahilabti'g lalaki.

"Gidayeg nako ang imong kaisog sa pag-atubang sa kamatuoran. Dili maglagyo ang naagian nato nga kasinatian sa kinabuhi Wen," matud ni Miguel. Gisaysayan usab ni Miguel si Wenna nga biktima usab siya sa gugma.

Hapit na mousa ka tuig nga naminyo ang iyang girlfriend didto sa ilang dapit sa Barangay Lapaz, dakbayan sa Bogo. Wala kini makapaabot kaniya nga mobalik aron tumanon ang ilang saad nga magminyo na.

Giisip ni Miguel nga true-love g'yud niya si Alice, apan tungod sa naangkon niya nga kapakyasan sa ilang gugma, nahimo siya nga palakero na sa mga babaye kay dili siya gusto nga mapakyas lang pag-usab.

Apan lahi ang gibati karon ni Miguel nga nakaila niya si Wenna. Pormal nga pagka babaye si Wenna ug sa iyang pagtimbang-timbang, lahi kini sa ubang babaye nga iyang nakaila.

May babaye nga gikarelasyon si Miguel pagka karon. Gani tulo sila nga nahimo niya nga girlfriend apan bana-bana ni Miguel nga pulos sila wala'y panglantaw sa kinabuhi.

Wala palandunga ni Miguel nga makahinuktok siya nga naghuna-huna sa iyang kasugiran sa gugma. "Hoy, nganong mora'g lawom man kaayo ang imong gihuna-huna Migs?" ni Wenna pa nga maoy nakaputol sa paghinuktok ni Miguel.

"Ay, sori kaayo Wen ha?" matud ni Miguel. "Ngano diay nga nakahuna-huna ka nga tabangan ko ganina? Unya gihatud pa gayud ko nimo?" nangutana si Wenna kang Miguel.

Wala dayon makatubag si Miguel sa pangutana ni Wenna. Gisud-ong niya pagbalik ang hamis kaayo nga paa sa dalaga nga maoy tinuod nga nakadani kaniya nga tabangan si Wenna pagpamunit sa iyang pinalit nga nakatag sa karsada.

"Kuan, kining gusto ko nga makig-amiga nimo mao nga gitabangan ko ikaw ug namugos ko nga ihatud ka," matud ni Miguel. Migawas ang inahan ni Wenna nga nagdala og ilang makaon ug mainom. (Sumpayan)