Mirisi

Mirisi. singgit ni Adela ning sayong buntag, ngadto ni Brando nga hapit nadat-ugi sa sakyanan nga iyang giisa sa jack. Nahunlak ang jack. Maayo gani wa nidayon og hagsa ang sakyanan. Nidali og gawas si Brando gikan sa ilawom sa sakyanan. Nikuha siya og laing jack. Kadtong gipanag-iya sa puyopuyo ni Adela. Kini si Adela minyo. Buwag sa bana. Dunay usa ka anak. Daga na. Ug wa niya makig-uban og puyo. Kay di kaagwanta sa kinaiya sa iyang mama. Si Brando, 19 pay edad, ulitawo, pag-umangkon ni Adela. All-around siya nga boy. Siyay tiglingaw sa duha ka anak ni Adela, anak nila sa iyang puyopuyo. Nahimong yaya nga lalaki si Brando. May duha ka anak si Adela ni Carlo nga usa ka biyudo ug dunay duha ka anak puro na ulitawo’g daga. Sa buhi pa ang asawa ni Carlo, kusinera nila si Adela.

Igihan ni si Adela sa iyang mga sakop ug sa mga silingan. Duna siya’y tindahan og sari-sari dalang karenderya ug videokehan. Si Brando usahay iyang pabantayon sa tindahan. Unya samtang wa pay customer mangita sab si Brando og sideline. Unsaong wa man siya’y klarong sweldo kay gipapuyo lang siyang Adela kunohay og libre. Si Carlo dunay unom ka doors nga apartment dinhi sa iyang compound sa baryo Esmeralda. Usa sa nag-abang sa apartment, si Frank nga usa ka CPA.

Sa niaging gabii gikan siyang nitambong og komperensiya sa kliyente, natunok ang tuong abante nga ligid sa Toyota FX ni Frank. Wa siya’y kalibutan. Pagkabuntag nakita na lang niya nga nagyaka na sa kaplat ang ligid. Nihagad si Brando nga maoy moilis sa ligid. Nisugot dayon si Frank aron di manakit iyang lawas sa paglinubag sa tirings ug bomba sa jack. Atbang ra mas tindahan ni Adela ang giparkingan sa Toyota FX nga abuhon.

Nakaingon si Brando sa iyang hunahuna nga nagpakita gyud sa ka way grado ang iyang iyaan. Way kaikog sa tag-iya sa sakyanan sa pagsinggit niyang “mirisi”. Sa ato pa malipay diay siyang madisgrasya iyang pag-umangkon ug ang sakyanan sa iyang silingan. Naningkamot lang si Brando nga maka-sideline. Kay way tarong suweldo. Dili sab siya ganahang mobiya kay nalooy siya ni Carlo nga tiguwang na ug masakiton. Gawas pa, nasuod na sab niya ang duha ka anak lalaki nilang Carlo ug Adela. Moparayeg niya ang mga bata nga sila si Glen, 7 anyos ug Hector, 4 anyos. Siya ang tighatud kuha sa mga bata sa eskuylahan. Sakay lang sa motorsiklo nga gipalit ni Carlo para lang madrayban niya. Bag-o lang gani siyang nakalukat og lisensiya sa pagmaneho og sakyanan.

Wa nay klarong stock ang tindahan ni Adela. Lutaw ang ganansiya. Lunod ang puhonan. Kay grabe ka adik si Adela sa sugal. Kusog mopustag masyaw ug lotto., Way daug daug. Sobra tres sentos ang patad matag adlaw. Ang gibayad sa patad kinuha sa koleksyon sa tindahan. Wa nay ikatuyok na capital. Puro nalang binitay nga junk food ang naas tindahan. Apan ang uban expired na og mga sulod. Sigi lang gidispli aron ingnon duna pay tinda. Nagsigig pangayo ni Carlo ug iabuno sa puhonan. Mohatag usahay si Carlo apan magbagolbol.

Igong nahuman si Brando og ilis sa ligid, gisuholan siyang Frank og P200. Puerte niyang lipaya. Mapasalamaton nga namahid sa iyang singot sa agtang pinaagi sa likod sa iyang walang kamot.

Gibiking ni Brando ang jack ni Carlo aron iyang iuli sa butangan. Apan lagi kay si Adela igihan sa iyang butang, gibawi niya ang jack. Gilabni niya gikan sa kamot ni Brando.” Ambi na bi!” ni Adela. Nakalitan si Brando ug nabuhian niya ang jack samtang wa pa sab naguniti ni Adela.

Nahulog ang jack. Didto gyud tugpa sa tuong kumangko sa tiil ni Adela ang jack. “Ayay!!” pwerteng siyagit ug iniktin ni Adela sa kasakit sa iyang tiil nga nabundakan sa jack. Daw gidukdok og maso ang kulamoy sa tiil ni Adela. “Mirisi sab!” ni Brando nga nisulod sa tindahan kay mopadayon sa pagbantay sa tindahang nagkahapay. (Kataposan)