Nabuntis

Dear Tita Salie,

Have a wonderful day. Just call me Jay, usa ka batan-on ug nagtungha pa sa college.

Ang akong problema kabahin kini sa akong girlfriend. Taud-taod na ang among relasyon ug hangtod karon kami lang gihapon. Tungod kay pareho kaming nagtungha pa, dili kami gusto nga makasab-an sa among mga ginikanan. Busa amo gyod nga gitago ngadto kanila kining among relasyon. Wala gyod kami gisultihan niini bisan kinsa. Kay dili namo gusto nga motaas unya ang estorya ug daghan na ang masayod ug posible gyod nga moabot kini sa among tagsa-tagsa ka panimalay.

Apan ang problema namo karon kay nabuntis ang akong girlfriend, Tita. Nagdahom ra ba gyod ang iyang mga ginikanan nga nagtinarong siya sa iyang pag-eskuyla. Ug siya ra ba ang gisaligan sa iyang mga igsuon nga maoy motabang nila aron usab sila makatungha sa college. Ug gusto usab ako nga makalampos ko sa akong pagtuon kay nag-expect ra ba ang akong mga ginikanan nga maka-graduate gyod ko sa college. Mao kini ang nakahasol kanako karon kun unsaon namo pagpasabot sa among mga ginikanan kabahin sa nahitabo karon kanamo.

Palihog, Tita, Salie, pasabta ko aron maluag-luagan na ang akong pamati. Thank you very much and more power to your page. -- Jay

* * *

Dear Jay.

Dili na man kana lisod ipasabot ngadto sa inyong mga ginikanan. Dili na kinahanglan nga inyo silang pasabton kay sa pagpahibalo pa lang ninyo ngadto kanila masabtan na nila ang nahitabo kaninyong duha. Ang lisod nga buhaton mao ang pagpahibalo ngadto sa inyong mga ginikanan tungod kay anaa kaninyong duha ang tumang kahadlok sa ilang mamahimong reaction kun ugaling ilang masayran ang tanan. Nahadlok kamo nga dili nila madawat ang nahitabo kaninyong duha, kay nasayod kamo nga lisod kaayo ang pagpa-eskuyla karong panahona.

Apan wala na kita mahimo niana, bisan paman kondili ninyo sila pahibaw-on, masayran gihapon nila ang tanan. Mas maayo siguro kun unahan ninyo pagsulti ang parents sa imong uyab pinaagi sa pag-text. Puyde usab nga ang imong uyab mismo ang mopahibalo sa iyang parents bahin niini ug ayaw usa pakita kanila kay tingali og unsaon ka. Paghuwat lamang nga ipatawag ka. Imo usab pahibaw-on ang imong mga ginikanan sa sayop nga imong nahimo.

Mangayo gyod mo og pasaylo nila kay sayop gyod ang inyong nahimo. Wala kamoy laing buhaton kondili andamon ang inyong kaugalingon ug dawaton kon unsay hukom sa inyong parents. Dapat responsable gyod ka sa tanan nimong gibuhat, busa kinahanglan kanunay kang andam. -- Tita Salie