Man Hater

Gula 150

Sila si Salie ug Yuri nagpatahi dayon sa ilang sapot sa kasal. Kolor abokado ang motiff sa ilang sapot. Mao usab ang mga abay. Malipayon kaayo sila nga nagpaabot sa maong okasyon kanus-a sila hiusahon sa kaminyoon.

Domingo sa buntag. Niining adlawa si Salie misimba sa Katedral. Gikan didto, ang dalaga milahos sa sementeryo — sa lubnganan ni Mama niya Azon ug ni Suzette nga iyang igsuon.

Nakugang si Salie ug napahunong makadiyot sa paglakaw pagkamatikod niya nga may tawo nga nagbarog atubangan sa mga panteyon sa iyang inahan ug igsuon. Nagtalikod kini ug wala makamatikod sa iyang pagdangadanga. Naglibog ang dalaga kun nag-unsa ang maong lalaki sa lubong sa iyang inahan ug igsuon.

Mihinay si Salie pagduol sa nagtalikod nga lalaki. Gikulbaan siya. Lain kaayo ang hurohuro sa iyang gibati. Ang lalaki —pagkamatikod nga may tawo sa iyang luyo— mihinay pagliso ug miatubang kaniya. Nagluha ang mga mata niini.

“Papa!” nakugang si Salie sa nakaila na. Ug dihadiha tugob sa kahinangop nga gigakos niya ang gikamingawang amahan. Naminaw sa iyang mga mata ang mga lusok sa mga luha.

“P-pasayloa ako, anak,” nahigakos usab si Noy Bestre kang Salie nga naminaw sa mga mata ang luha. Daw sangko gayod sa langit ang iyang pagbasol sa iyang nabuhat. Midaot kini pag-ayo ug daw nagmasakiton. Nagkalago ang sinena.

“Gipasaylo ko na ikaw, Papa. Gipasaylo ko na ikaw.” Mibakho na gayod si Salie nga migakos pag-ayo sa amahan. Karon lang niya natugkad nga gimahal gihapon niya ang iyang amahan — bisan pa sa pagkasala niini. Natugkad pud niya sa iyang kaugalingon nga maantigo na siyang mopasaylo. Ug andam na siya sa pagpasaylo sa mga binuhat nga nakasala kaniya.

Nabatyagan ni Salie nga andam na siya karon sa paghikalimot sa tanang masakit nga nahitabo sa kagahapon. Mao nay iyang atubangon ang masanagong ugma uban kang Yuri nga umaabot niyang kapikas ug sa iyang amahan nga nahibalik na kaniya.-- Kataposan