Man Hater

Gula 149

Inyo diay kong gipaon, ha?”

“Wala kadto tuyoa. Naatol lang nga si Allan nga maoy among target didto mopaingon sa imong pinuy-anan tungod sa daotan niyang tuyo kanimo. Ikaw unta ang sunod niyang biktimahon.”

“Sa sinugdan nagtuo na gayod ako nga imo lang kong gibinuangan tungod sa wala mo pagtuman sa atong sabot. Mao nga tungod sa akong kalagot mikuyog ako kang Allan ug diriyot na hinuon madisgrasya.”

“Dili ko mahimo ang pagbinuang kanimo. Ug kun may daotan pa nga nahitabo kanimo, dili tingali ako papahuwayon sa akong tanlag.”

Midip-ig si Salie kang Yuri. Unya nangatawa sila.

Ang sabot nilang Salie ug Yuri nga ang ulitawo mamalaye kaniya — paglabay sa pipila ka adlaw — nahinayon na gayod. Kuyog sa iyang mga ginikanan ug igsuong babaye nga si Rose, si Yuri miadto sa pinuy-anan sa dalaga. Nagdala sila’g mga pagkaon.

Kadali ra ang ilang pagsabotsabot ug gitakda ang ilang kasal nianang pagkasunod bulan. Gisugdan gilayon ang makuting pagpangandam.

Ang mga invitation card nga gisulod sa mga sobre gipadala nila ngadto sa daghang mga dinapit sa kasal. Ug usa sa gipadad-an mao si Mr. Pocholo Suarez, ang editor-in-chief sa Moon-Star Daily. Ingon gani sa naglisod pagtuo ang editor ingon man ang ubang mga kawani sa Sunlight Publishing nga siya si Salie — ang man-hater — magminyo na. May pipila usab nga miingon nga ang katig-a sa balatian ni Salie gidaog gayod sa kapulihay sa gahom sa gugma. -- Taposon sunod gula