Habal habal

Gula 5

Dali ra kaayo sila nga miabot sa TOPS si Efren ug ang Koreana nga si Leng. “Oh, Cebu City by night!” nakatuaw si Leng nga nagsud-ong sa kaanindot sa talan-awon sa kinaubsan kay makita man gikan sa ilang nahimutangan ang tibuok dakbayan.

“Ok we will go inside,” giingnan sa Koreana si Efren dihang mikuot kini sa iyang bulsa aron mobayad sa tag P50 nga entrance fee. Milingi-lingi si Leng ug nagsunod kaniya si Efren.

Taud-taud, misinggit si Leng pagkakita sa tulo niya ka higala nga mga Koreana usab. Dayon naghangpanay ang tulo ka babaye ug nagsultihanay og kinoryana nga wala gayud masabti ni Efren. Nagkataw-anay sila ingon man ang mga lalaki nga gika-deyt sa mga babaye.

“Efren, they are my country mates. They are also studying here in Cebu City like me,” giingnan ni Leng si Efren. Igo lang mikatawa si Efren. Bisan og nag-drive si Efren og habal-habal nga motorsiklo, apan dili siya mailhan kay disente ang iyang panapot.

Gikan sa opisina wala pa siya mauli sa balay mao nga ang sinena nga pangtrabaho mao pa ang iyang gisul-ob. Nakabantay si Efren nga walay partner si Leng nga sama kaniya og nationality.

Taud-taud, nagbuwag-buwag ang magbarkada. Iya-iya lang og pangita’g kaluklokan. Nahabilin si Leng nga walay partner. “Where is your boyfriend Leng? Is he coming?” wala makapugong si Efren sa pagpangutana sa Koreana.

“No, I don’t have a boyfriend. I don’t want to have a sweetheart who is also a Korean. I like Filipino. Oh its very cold here,” matud   ni Leng nga migunit sa bukton ni Efren.

Takulahaw lang nga nanginit ang kalawasan ni Efren. Daw dunay boltahe sa kuryente nga mikuyamang sa iyang kalawasan dihang nagkabag-id ang ilang lawas ug sa Koreana.

Inay mangurog tungod sa kabugnaw sa panahon didto sa TOPS, daw gidang-danga sa kainit ang kalawasan ni Efren. Gigunitan ni Efren ang wala nga palad sa Koreana nga dalaga.

Gipasagdan lang usab siya sa Koreana. Mitutok hinoon ang Koreana kaniya sa tinan-awan nga daw nagdala’g come here. Wala na gayud makapugong si Efren, giagbayan niya si Leng.

Nakita niya nga mipahiyom si Leng. “We will go there,” giingnan siya sa Koreana dungan sa pagtudlo niadtong ngitngit nga bahin nga adunay daw gituyo pagporma nga mga langob.

Mora og gituyo nga gibutangan og lapad nga lingkoranan nga mahimo gani kahigdaan kay aron kun adunay uwan dili mabasa ang mobisita sa TOPS. (Sumpayan)