Mata sa Kasingkasing - Gula 151

Gikablit ni Almina ang gigunitan niining pistola ug naigo si Erik. Dihadiha natumba si Erik ug si Angeline misiyagit sa tumang kalisang.

Ingon sa natarantar si Almina pagkakita nga nagkadugo si Erik.Midagan kini nga wala’y tumong. Si Angeline nangayo og pakitabang aron madala si Erik sa tambalanan.

Sa gawas sa emergency room, naghilak si Angeline. Nabalaka siya pag-ayo sa kahimtang ni Erik. Siya’y hinungdan nga napusilan ni Almina si Erik.

Wala madugay nahiabot ang mga ginikanan ug igsuon ni Erik. Nakaila na sila kang Angeline kay gipaila na man siya ni Erik ngadto kanila usa ka higayon niana.

“Unsa man ning hitaboa?” Nangutana si Mrs. Daarol.

Gisuginlan ni Angeline ang mga ginikanan ug igsuon ni Erik sa nahitabo.

“Salbahis nga Almina!” Nagpaminte sa kalagot si Mrs. Daarol. “Magbayad siya’g mahal sa iyang gibuhat sa akong anak.”

“Ipabilanggo ta siya,” dason ni Mr. Daarol.

Pagkaugma, unconscious pa gihapon si Erik. Nagpadayon pa kini sa pagpakigbugno sa kamatayon. Nabalaka na pag-ayo ang mga ginikanan ug mga igsuon niini.

-- Taposon sunod gula