Man Hater - Gula 147

Giusab pagpukpok ni Yuri ang pultahan. Ablihi ang pultahan, Allan! Ayaw pasipad-i si Salie! Ampo nga malinawon sa mga kamot sa balaod!”

“Dili ako ingon niana ka gago, Inspector!”

“Kun dili mo ablihan ang pultahan, mapugos kami sa pagguba niini!”

Gipunting ni Allan ang pistola sa pultahan. “Sige, sulod kun gusto ka nang mamatay!” Ug gisundan kini sa makantalitahong katawa sa ulitawo.

“Pagbantay, Yuri!” ni Salie. “May armas siya! Mameligro ka!”

Gisap-ongan ni Allan ang baba sa dalaga, ang tumoy sa iyang pistola gidaitol sa liog niini. “Hilom aron dili ikaw ang una kong pusilon!” Bog! Bog! Bog! Katulo gayod tindaki ni Yuri ang sera una pa kini maabli.

Bang! Bang! Bang! Unang mibuga ug mga bala ang pistola ni Allan. Apan abtik nga nakaligid ang alagad sa balaod. Anad na si Yuri sa maong sitwasyon.

Bang! Bang! Bang! Bang! Mibalos si Yuri. Makabungog ang mga butobuto. Nakasiyagit si Salie sa kalisang. Si Allan ingon sa misayaw nga naigo sa mga bala, ug unya nahagba sa salog nga nagkadugo ang lawas. Nabuhian ni Allan ang gigunitan nga pistola.

Midali pagtindog si Yuri ug miduol sa nahimutangan ni Salie. Gihubad niya ang pisi nga gigapos sa dalaga. Wala kapugngi ni Salie ang nag-awas nga kalipay, gigakos niya ang iyang hinigugma. Ingon sa kahilakon sa kalipay. Apan dili makalugwa ang iyang mga luha. -- Sumpayan pa