Matinguhaong pahiyom

Nangolekta na sad og amot si Titing sa iyang mga kasilinganan. Ang kuwarta nga makolekta, ipalit og bulak nga idayandayan sa karo sa imahen ni Maria nga maoy itagbo sa karo sa imahen ni Cristo. Ang maong panagtagbo maoy kasaulogan sa ‘Sugat’ sa nabanhaw’ng Ginoo. Ang ‘Sugat’ himuon sa plasa sa simbahan.

Ang pagpangolekta og amot maoy usa sa mga kalihokan sa kapunongan nga nangalagad sa simbahan. Ang maong klase sa pangatungdanan maoy gikalisdan sa kadaghanan ilabi na niadtong daling dutlan sa kaulaw kun balibaran.

Namatikdan ni Titing nga sa iyang pagpangolekta og amot; anaa gyu’y manglikay, molihay ug mobalibad nga may tinagoang biaybiay.

“Mangolekta na sa’g amot, unya baratuhon ang buwak nga ihad sa karo.”

“Wala’y balansi sa iyang nakolekta ug nagasto.”

“Nangangkon nga maoy nihad sa karo, unya kinolekta diay ang gigasto.”

Kining tanang pagyubit nga naalinggatan ni Titing wala makababag sa iyang tuyo nga makaambit sa mga kalihokan sa simbahan ang iyang mga kasilinganan. Mipatigbabaw sa iyang hunahuna ang tinguha, nga makaamgo na unta sila sa kaundanon sa panultihon: “Diha sa paghatag ikaw makadawat og daghan. Ang imong amot makatabang sa nanginahanglan.”

Alang ni Titing, ang katinuod sa maong panultihon nahitabo na sa iyang kaugalingon. Kun siya’y pasultihon, ang mga grasya nga iyang nadawat kaniadto ug karon maoy usa ka dakung panig- ingnan. Dili ikalimod nga bisan sa iyang pagkatindera og buwad ug ginamos sa Taboan, nakabana siya og usa ka enhinyero nga arang arang og suweldo. Nakapatapos siya og unom ka anak sa kolehiyo nga karon pulos na titulado. Nangaminyo ug adunay maayong trabaho. Kabus siya apan hayahay. Halos tanang mga lungsod sa Sugbo nga gibisitahan sa mga turista iya nang naadtoan, ingon man sa mga probinsiya sa Samar, Iloilo, Leyte, Pampanga, Baguio ug uban pa. Nakaadto sab siya sa Ruins of Saint Paul sa Macau, Ocean Park ug Disneyland sa Hong Kong, Temple of Dawn sa Bangkok, Thailand.

Alas kuwatro sa kaadlawon, mikuyog si Titing sa prosesyon sa mga tawo padulong sa simbahan diin adto sauloga ang ‘Sugat’ sa pagkabanhaw sa namatay natong Ginoo. Nagsunod siya sa imahen sa Mahal nga Birhen Maria nga gisakay sa karo nga nindot kaayong pagkahad ni Turo. Nangalimyon ang bulak sa kahumot nga nasimhot sa nagpakaamot.

Milugmaw ang luha ni Titing sa kalipay nga nakasaksi sa kamalipayon sa katawhan nga nagsaulog sa pagkabanhaw sa atong Ginoo bisan pa sa makaping-it nga kalisud sa panginabuhi. Mibathay sa iyang panagway ang usa ka matinguhaong pahiyom. Nakatuwaw: “Lord, salamat sa kahapsay sa among pagsaulog sa imong pagkabanhaw. Molabaw pa unta niini kamalampuson ug kamalipayon ang among pagsaulog sa sunod tuig paabuton puhon.”(Kataposan)