Mata sa kasingkasing

Wala motingog si Angeline. Gihinuktokan niya ang tanang gisulti ni Erik, gikan sa labing dagko ngadto sa labing gagmay nga mga detalye. Ug inanay niyang nakombinser ang katinud-anay sa tinguha ni Erik. Dinhi wala kapugngi ni Angeline ang pagpatigbabaw sa kamatuoran.

“Gihigugma ko usab ikaw, Erik,” matud ni Angeline. “Sama nimo, gipahungaw ko lang usab ngadto kang Robert ang akong gibati alang nimo. Nagtuo man gud ko nga imposibleng magkatakdo ang atong mga pagbati tungod sa dakong kalainan sa atong kahimtang ug personalidad. Dili man gud ko guwapa sama sa uban. Dili ko nimo ikapasigarbo.”

“Ayaw pagsulti’g ingon niana,” ni Erik pa. “May katahom ka nga ang mata sa akong kasingkasing lang nakakita.”

Ug naggakos sila. Hugot kaayo ang ilang paggaksanay.

“May problema kita,” ni Angeline. Unsaon na man lang si Almina. Nagsabak ra ba siya.”

“Nasakpan ko siya nga mikuyog sa usa ka lalaki sa makaduha ka higayon sulod sa usa ka motel. Dihang ako siyang gisudyaan, miangkon siya nga dili akoy matuod nga amahan sa bata nga iyang gisabak. Di man akoy naka-virgin niya. Maong wa gyud koy interes nga magpakasal niya.” -- Sumpayan pa