Man Hater

Gula 144

Nahinumdom karon si Salie nga usa niana ka higayon gikuhaan siya’g hulagway ni Allan samtang nagsakay sila sa awto. Nagpaingon sila niadto sa bakanteng lote diin didto ang patay’ng lawas ni Debbie. Nasuko pa gani siya sa ulitawo niadtong higayona sa pagkuha niini’g hulagway kaniya.

Kalit natukas ang palid sa pultahan ug dihadiha iyang nakita nga misulod si Allan. May gisapwang kining babaye nga wala’y panimuot. Milabhag sa panagway ni Salie ang hilabihang kahikurat ug kakugang pagkakita niya sa maong babaye. Nanagko ang iyang mga mata. Si Vilma ang babaye nga gisapwang ni Allan! Gibutang kini sa lalake sa salog ug gibutanga’g barahang queen ang dughan niini.

“Vilma!” mitiyabaw si Salie sa kalisang. “Vilma unsay nahitabo nimo.” “Vilma...!”

Miduol si Allan kaniya. “Nag-usik-usik ka lang sa imong laway. Di ka na mabati ni Vashti kay patay na siya.” Ug mipaghak kini pagkatawa.

Sa tan-aw ni Salie nahisama si Allan sa usa ka sungayang demonyo. “Salbahis ka! Kriminal! Buhii ko! Ayaw ko gaposa, kriminal!”

“Ngano bang mamugos ka man nga akong buhian? Di ba giingnan ko na man ikaw nga anhi ka na dinhi uban kanako? Pero ayaw kabalaka kay wala’y mahitabo kanimo. Di ta ka hilabtan kay gimahal tika.”

“Buang kang dako! Buang ka! Dili mahitabo nga makigtipon ako og usa ka tawong buang ug kriminal pa gyud!” -- Sumpayan pa