Buotang Doktor

Gula 7

Wala gayud damha ni Liza nga atol sa iyang birthday, mahimo niya nga boyfriend si Dr. Gabriel. Lingaw kaayo siya sa pakig-uban sa doktor niadtong gabiona.

“Sukad karon, Gabs na lay itawag nako Liz, ayaw na ko’g sangpita og doktor,” giingnan ni Gabriel ang iyang girlfriend. Gihatud ni Gabriel si Liza didto sa ilang balay. Daghan pa gihapong tawo sa gawas sa karsada bisan og hapit na motungang gabii.

“Kami bantay sa sakyanan Sir,” matud sa mga batan-on. “Sige, bantayi palihug Dong,” dali nga tubag sa doktor. Nahinangop ang amahan ni Liza nga sayo nga mipauli sila si Dr. Gabriel ug ang iyang anak. Dali ra kaayo nga nakabantay ang amahan nga may relasyon na ang duha. “Nong, dili ni binuang ang ako mao nga pahibaw-on ko ikaw nga sweetheart na kami ni Liza. Ayaw kabalaka namo kay siya ang akong himoong kapikas,” matud ni Gabriel.

Nakapahiyom si Nong Estong. “Wala ko’y pagsupak sa inyong relasyon kun magkasabot mong duha Dok. Malipay pa gani ko nga ang ako na nga umagad ang moatiman nako kun masakit ko pag-usab.”

Milabay ang mga adlaw. Kanunay na sila nga magkuyog si Liza ug Dr. Gabriel. Kanunay sila nga magparayganay sulod sa kotse sa doktor. Miabot ang higayon nga daw dili na nila kapugngan ang kaugalingon.

“Manulod ta’g motel Liz,” giingnan ni Gabriel ang iyang girlfriend. Pwerte nga nakapamalibad ni Liza. Mihangyo gayud pag-ayo si Gabriel dungan sa matintalon kaayo nga parayeg.

Apan wala gayud magpadala sa tentasyon si Liza. Mihilak kini’g maayo. “Gab, ayaw tawon ko og buhati nianang anaa sa imong huna-huna mentras wala pa kita makasal. Kana ra’ng butanga ang akong ikagasa kanimo atol sa unang gabii sa atong kaminyoon.”

Diha na gayud masuta ni Gabriel ang kabuotan ni Liza. “Ayaw kabalaka Liz, tungod sa gipakita mo nga hugot nga baruganan, misamot ang dako ko nga pagsalig kanimo. Kasaligan ka gayud,” sa doktor pa.

Gihatud ni Gabriel si Liza pagpauli. Gihuwat sa doktor nga moabot ang amahan niini gikan sa trabaho. “Nong, gituyo gayud nako nga huwaton ka. Mananghid unta ko nimo nga pakaslan na nako si Liza.”

Nakalitan kaayo si Liza sa iyang nadungog. Dali ra kaayo nga nasabotan ang kasal nila ni Liza ug Gabriel. Sa dakung hotel dinhi sa dakbayan kini gipahigayon.

Sa gabii sa ilang kasal. “Karon, matuman na ang imong tinguha Gabriel. Sige na, angkona ang ako sa hingpit,” ni Liza pa nga matintalon sa iyang bana. (Katapusan)