Buotang Doktor

Gula 6

Wala makaharong si Liza dihang gitutokan siya ni Dr. Gabriel. Miduko siya apan gihapohap sa batan-ong doktor ang iyang bukton.

“Liz, ambot og nakasabot ka ba kaha sa akong tinagdan nimo,” matud sa doktor nga daw seryoso ang tingog. “Unsa man,” daw may pagka hilaw ang tingog sa dalaga nga nakabantay nga mora’g manguyab kaniya si Dr. Gabriel.

“Dihang nagkaila kita didto sa ospital nga nagbantay ka sa masakiton mo nga amahan, hinay-hinay ko nga mibati og paghigugma kanimo,” matud sa doktor nga mitutok pag-ayo kang Liza.

Nangurog ang kaunoran ni Liza nga nakadungog sa pagpangamural ni Dr. Gabriel kaniya. Alang kang Liza dili sila pareson tungod kay professional na si Gabriel samtang siya igo lang nakatung-tong sa kolehiyo ug pobre.

Wala magtingog si Liza. “Please Liz, ayaw ko pakyasa,” sa doktor pa. “Dok, nganong ako man ang imong panguyaban nga naa may daghang nurse nga kauban nimo sa trabaho,” gisukna sa dalaga ang doktor.

“Anaa kanimo ang hiyas sa usa ka babaye nga gusto ko nga himoong kapikas sa kinabuhi. Dili ka arte nga pagka babaye, buotan ug labaw sa tanan, may gitagoan nga talagsaong kaanyag,” pasabot ni Dr. Gabriel.

Nakapahiyom si Liza nga nakadungog. “Ayaw ko’g kataw-i Liz. Toohi ko nga wala ko magkomedya sa akong gitug-an kanimo,” dason sa doktor.

“Wala koy profession nga ikapasigarbo nimo Dok. Wala gani ko makahuman sa pag-eskwela mao nga dili kita pareson kay usa ka na ka professional,” pasabot ni Liza.

Miinsistir ang doktor. “Kun imo ko’ng sugton Liz, bisan og minyo na kita, patiwason ko ikaw sa pag-eskwela.” Daw nabantayan ni Gabriel nga mibathay ang pahiyom sa mga ngabil ni Liza nga nakadungog.

Miginhawa og lawom ang dalaga. Unya mibawos kini sa pagtutok sa doktor. Nagtinutokay silang duha. “Sa akong pagtimbang-timbang, dili ko angayan nga mahimo nimo nga kapikas, apan naglisud ko pagbalibad kanimo Dok,” sa dalaga pa.

Nahinangop kaayo si Gabriel nga nakadungog. Midikit siya kang Liza ug iyang giagbayan. Wala siya makapugong ug nahagkan niya ang dalaga. “Thank you Liz. I love you.”

“Gikuyawan ko nga ingnon unya nimo nga mapahimuslanon sa higayon. Apan isipon nako nga ang imong gugma apil sa akong birthday gifts gikan nimo ug ako kini nga ampingan,” matud ni Liza.  (Sumpayan)