Mata sa Kasingkasing

Gula 147

Apan wala masulbad sa hingpit ang suliran ni Angeline kay bisan wala na makasamok si Erik kaniya, may lain pa mang lalaki nga naghasol kaniya. Si Christopher.

Hapit tanang gabii mamisita si Christopher kaniya. Bisan kapila na niya balibari apan wala gayod mopatuo ang lalaki. Nagpadayon gayod kini sa pagpangulitawo kaniya.

“Itakli na lang ngadto sa laing babaye ang imong gugma Christ,” nagkanayon si Angeline usa ka gabii niana.

“Dili mo katudloan ang akong kasingkasing, Angeline, kay ikaw ang gipitik niini,” matud ni Christopher.

Dihay gabii nga wala na atubanga ni Angeline si Christopher sa pagpamisita niini kaniya. Nibati na siya’g kapuol. Gikapoy na siya’g sige’g pamalibad. Naglagot na siya kang Christopher. Maong gusto na pud niyang likayan ang ulitawo.

Usa ka adlaw niana, si Angeline rang usa ang nahibilin sa ilang balay. Ang iyang mga ginikanan ug igsuon miadto sa sentro sa barangay aron manan-aw og kalingawan. Nagsingabot na man gud ang pangilin sa ilang dapit. Siya ray nahibilin sa balay. Mahiligon siya sa pag-inusara. -- Sumpayan pa