Buotang Doktor

Gula 5

Gikuha ni Liza ang iyang birthday gift nga gihatag kaniya ni Dr. Gabriel. Hinay kini niya nga gibuksan. “Hala! tats skren nga selpon! Kanindot! Unya dia pa g’yuy pitaka!” wala makapugong sa iyang kalipay si Liza pagkakita sa iyang gift.

Napalingi ang iyang Mama ug Papa tungod sa pagtaas sa iyang tingog. Miduol sa ilang nahimutangan ang mga ginikanan sa dalaga. “Hala, kamahalon anang imong gift Liz,” matud sa amahan. Nagpahiyom ra nga nagtan-aw si Dr. Gabriel.

“Salamat gayud kaayo Dok ha? Lipay g’yud kaayo ko,” matud ni Liza nga migunit sa bukton sa doktor. “Buksi usa ang pitaka kun makagusto ka ba?” giingnan ni Dr. Gabriel si Liza.

Misamot nga napasinggit si Liza tungod sa kalipay pagkakita nga ang pitaka nga gift niya gikan ni Dr. Gabriel gisudlan kini og lima ka tag usa ka libo ka pesos. “Grabe! Kanindot sa akong gift! Salamat g’yud dok,” ni Liza pa.

“Lahi gayud kun mga datu ang mohatag og gift Dok kay mahalon ang ihatag mao nga kaming mga pobre malipay g’yud kaayo. Salamat Dok ha,” sa amahan pa ni Liza nga mipikpik sa abaga sa doktor.

“Walay sapayan Nong. Isuroy na nako si Liza isip dugang gift nako niya kay para malingaw siya,” matud sa doktor. “Walay problema Dok, basta ikaw,” matud sa amahan sa dalaga.

Wala na mag-ilis pa si Liza sa iyang gisul-ob. Igo ra niya gisudlay pag-usab ang iyang buhok atubangan sa salamin nga nagkumbitay diha sa bungbong sa balay. “Tana Dok,” iyang giingnan ang doktor.

Gihatud sila sa amahan ni Liza didto sa gawas. “Pag-ayo-ayo mo Dok, Liza,” matud sa amahan sa dalaga sa dayon nang dagan sa awto. Nakapanglingo-lingo ang mga silingan ni Liza nga nakakita sa de-kotse nga bisita sa dalaga.

“Mao to ang imong umagaron Nong Estong?” wala makapugong pagpangutana ang uban sa iyang mga silingan. Igo lang mikatawa ang amahan ni Liza.

Didto gidala ni Dr. Gabriel si Liza sa usa ka mahalon nga diskohan. Gusto niya nga ipakita sa dalaga nga bililhon kini alang kaniya. Sanglit T-shirt ang gisul-ob ni Liza, tataw kaayo ni Dr. Gabriel nga makita ang porma sa iyang lawas.

Lingaw kaayo si Liza sa ilang pagpares pagsayaw ni Gabriel. Gikan sa disco, mitan-aw sila og stand-up comedy nga gipasiugdahan sa mga bayot. Misamot nga nalingaw kaayo si Liza sa ilang komedya.

“Salamat kaayo sa imong gifts nako Dok ha,” mitutok si Liza kang Gabriel. Gigunitan sa doktor ang tuo niya nga palad. (Sumpayan)