Dili kaayo daghan ang mga bisita ni Liza ug sa iyang mga ginikanan. "Liza atimana pag-ayo si Dr. Gabriel kay kun wala pa siya, patay na tingali ko karon," matud sa amahan sa dalaga.
Gitutokan pag-ayo ni Gabriel si Liza ug diha pa gayud niya masuta ang talagsaong kaanyag niini nga lahi sa ubang babaye. Bisan og nasabot sa doktor nga wala kaayo’y nindot nga sapot ang dalaga, apan milutaw gihapon ang iyang katahum.
Sagad sa mga babaye nga mag-birthday mosul-ob gayud sa labing bongga nila nga sinena, apan si Liza nagsul-ob lang og T-shirt ug karsones nga maong.
Nagdungan sila si Liza ug Gabriel sa pagpangaon. Misamot ang ilang kasuod. "Ikapila na nimo karon nga birthday Liz?" pangutana sa doktor. "Nineteen na ko Dok uy," dali nga tubag sa dalaga.
"Unya wala pa diay moanhi ang imong boyfriend? Basin og makasamok lang ko kaninyo," matud ni Dr. Gabriel. Daw miiknat og gamay ang kilay ni Liza. Mikibo ang iyang abaga apan wala magtingog. Taud-taud, human sa pipila ka segundos sa iyang pagpakahilom. "Wala pa ko'y boyfriend Dok uy."
Nakapahiyom si Dr. Gabriel nga nakadungog nga wala pa diay boyfriend si Liza. "Pwede ba og isuroy ko ikaw karon Liz? Hilig ka ba og disco?" matud sa doktor. Nasabtan ni Gabriel nga gusto si Liza nga mouban pagpanuroy apan maikog lang sa iyang amahan.
Wala masayop si Gabriel. "Pananghid ni Papa kay dili kaayo na siya gusto nga magsuroy kami panahon sa gabii," ni Liza pa nga mitutok sa batan-ong doktor. Miyango-yango si Gabriel. Taud-taud, atol nga miduol kanila ang amahan ni Liza.
"Ikoga namo nimo Dok uy, wala gayud intawon mi ikadalit nimo. Bisan gani og video karaoke wala gayud kay pobre tawon mi," matud sa amahan sa dalaga.
Mitindog si Gabriel. "Walay problema Nong. Apan duna unta ko'y ihangyo nimo," ni Gabriel pa nga ang tingog maguwang lang sa hagawhaw. "Unsa kana Dok," nangutana ang amahan sa dalaga.
"Gusto unta nako nga isuroy si Liza karon kay para malingaw siya. Birthday niya karon mao nga dad-on unta nako siya sa disco," matud ni Dr. Gabriel. Wala gayud makabalibad ang amahan ni Liza. "Sige Dok, wala’y problema, pero isalig na lang nako siya nimo."
Paglakaw sa amahan ni Liza. "Sige na, buksi na ang imong gift kay manglakaw na ta," giingnan ni Gabriel ang dalaga. (Sumpayan)