Ms. Maldita vs. Crying Lady

Dear Tita Salie,

Hello! Just call me Ms. Maldita, 19 years of age, married nako ug duna nay baby. Mangayo lang unta ko sa imong mga bulawanong tambag ug pagpasabot kabahin sa akong kahimtang karon.

Naglibog man gud ko karon. Kining akong bana adunay ex-girlfriend tawgon lang nato siya og Crying Lady. Kini si Crying lady aduna nay baby karon. Niadtong buntis pa siya niadto siya sa balay sa akong bana og matud niya nga ang amahan sa iyang anak mao ang akong bana. Dili pa mi kasal sa akong bana niadtong panahona ug dili pa sad ko mabdos. Nag-una og kamabdos si Crying Lady, Tita. Perti gyod gubota sa ilang balay. Naghilak gyud ang maong babaye ug nagpakiluoy sa akong bana nga angkonon gyud ang iyang gisabak. Apan wala gyud moangkon ang akong bana bisan pa man kun niadto usab ang papa ni Crying Lady.

Nasayod na sila karon nga kasal na kami sa akong bana ug gisamok gyud ko nila pag-ayo sa facebook. Ila kong gitabangan pag-away. Ug matud pa nila nga kun duna na silay kwarta ila gyud nga ipa DNA test ang bata. Ug kun mahibaw-an gyud nga anak kini sa akong bana ila kunong ipabilanggo ang akong bana ug mangayo na sila og sustento sa bata.

Tinuod ba nga mapriso ang akong bana, Tita, kun mapamatud-an nga siya ang tinuod nga amahan sa anak ni Crying Lady? Palihog pasabta ko. Thank you very much and God bless.

-- Ms. Maldita

* * *

Hello Ms. Maldita,

Congratulations kay ikaw ang nagmadaugon sa inyong gugma ngadto sa usa ka lalaki nga karon nahimo nimong bana. Busa, imo gyod nga i-appreciate ang gugma sa imong bana kay bisan pa man sa tanan ikaw gyud ang iyang gihatagan sa korona sa usa ka rayna.

Ayaw kahadlok nga ilang ipa-DNA test ang bata kay bisan pa man kun mapamatud-an nga anak gyud sa imong bana ang anak ni Crying Lady dili nila puyde nga ipapriso ang imong bana kay wala siya’y kaso nga atubangon ug wala sila’y kaso nga puydeng ikapasaka. Ang puyde lamang nilang mahimo mao ang pagpangayo og sustento sa bata.

Ayaw tagda ang ilang pagpangaway ug pagdaut kanimo. Basta imo lang gibuhat ang unsay maayo ug sakto wala kay angay kabalak-an. Ayaw hatagi og pagtagad ang ilang mga gipanulti ug ayaw paapekto aron magpabiling malinawon ang inyong pagpuyo. Ug ayaw gyud awaya ang imong bana kun ugaling siya gyud ang tinuod nga amahan sa anak ni Crying Lady kay nag-una si Crying Lady nga niabot sa kinabuhi sa imong bana. Igo na nga pruweba sa iyang gugma ang pagpili kanimo nga mamahimo niyang asawa.

-- Tita Salie