Buotang Doktor

Gula 3

Wala danti og tunga sa oras ang pagpaabot ni Liza, nalantawan na niya si Dr. Gabriel nga nagpaingon sa iyang nahimutangan gikan sa Ward 5.

"Mag-ilis usa ko kadiyot Liz," matud sa doktor nga nagpahiyom. Nasabtan ni Liza nga gaan kaayo ang iyang buot ngadto sa doktor. Giisip na niya kini nga suod kaayo nga higala. Gisundan pagsud-ong ni Liza si Gabriel nga nagpaingon sa doctors' quarters.

Taud-taud, migawas si Dr. Gabriel nga nagsul-ob na lang og T-shirt. Dili na kini mailhan nga usa ka doktor. "Tana Liz," gihikap sa doktor ang abaga sa dalaga. Nanakay sila sa kotse sa doktor nga giparking atubangan sa ospital.

"Happy Birthday Liz," matud ni Gabriel nga milingi kang Liza nga diha maglingkod tupad kaniya sa front seat. May gikab-ot ang doktor sa luyo nga lingkoranan. "Duna ko'y giandam nga gift para nimo Liz… maayo unta og malipay ka niining gamay nako nga gift nimo," sa doktor pa nga mitunol sa package.

Wala makapugong si Liza sa pagbuhi sa iyang pahiyom. "Salamat kaayo Dok ha? Naghuna-huna ka pa gayud sa paghatag og gift nako. Wala na ako magpaabot niini kay alang nako, advance gift na nako ang pagtabang mo ni Papa," matud sa dalaga.

Miabot sila sa Barangay Labangon. Gigiyahan ni Liza ang doktor kun asa moparking human sila misulod sa usa ka gamay'ng karsada. Nahingangha ang doktor pagkakita nga diha ang iyang ngalan sa atubangan sa usa ka balay.

May karatola nga "Reserve for Dr. Gabriel" nga diha sa atubangan sa balay. Nakita sa doktor nga dunay tawo nga mosinyas nga adto siya moparking human niini gialsa ang karatola. Nakaila dayon si Gabriel nga mao kini ang amahan ni Liza.

Dali ra nga naka-park si Gabriel sa kotse. Paggawas nila ni Liza, gisugat sila sa amahan sa dalaga. "Salamat gayud kaayo Dok nga wala nimo pakyasa ang among pagdapit nimo," matud ni Delfin nga amahan ni Liza.

Misulod sila sa usa ka gamay'ng dalan-dalan, dayon didto sila mitangka sa usa ka dili kaayo daku nga balay. "Mao kini ang among pinobre nga balay Dok. Pasensya na kaayo ha?" ingon sa may kauwaw ang tono sa tingog ni Liza. "Walay problema Liz, pobre usab mi kaayo, swerte lang nga nahimo ako nga doktor," matud ni Gabriel nga mipikpik sa abaga sa dalaga. (Sumpayan)