Tungod sa text

Kadaghanan karon sa mga batan-on ang atong maingon nga nabuang sa text. Usa na kanila mao si Carla nga maayo gayod nga pagkabuang sa text. Ang iyang inahan, tendera lang sa merkado apan, kanunay niya kining pangayoan og kuwarta para sa load sa iyang cellphone. Usahay, mahimo nilang lalis kun dili siya hatagan sa iyang inahan para pang-load sa cellphone.

“Naunsa ka man Carla,” pulong sa iyang Mama Chading. “Maluoy ka kanako. Maayo ra ba kun dako ang atong kitaon sa paninda sa merkado. Paghinay-hinay sa imong paggamit nianang imong cellphone.”

“Si Mama, baya. Hilabihan gayod kana siya ka killjoy,” pulong ni Carla ngadto sa naglagot nga inahan. “Sagdi lang Ma kay kun makatrabaho ako, ako nay mopalit sa atong konsumo aron dili ka na maglagot.”

“Abi mo Carla, kanang cellphone, sama ra nga naggatas ka og usa ka bata. Busa, paghinay-hinay og gamit niana kay wala kay mahimo niana. Maayo lang kana sa mga negosyante.”

Tungod lagi sa cellphone, nakabaton si Carla og textmate nga matud pa ni Carla usa kuno kini ka estudyante sa kolehiyo. Matud ni Carla magkita kuno sila sa dili madugay.

“Maayo kana Carla, kay basin pinaagi nianang imong textmate, makapalit kana bisan sa imong pangload,” pulong ni mama Chading. “Pero ambot lang, maayo kun tarong kana nga tawo.”

“Sure Ma,” pulong ni Carla. “Next day, magkita kami kang Loyd.”

Pagka sunod nga adlaw, miabot nga magkita sila si Carla ug Loyd. Hapon kadto ug wala si Chading sa balay kay tua sa merkado nag-asikaso sa iyang negosyo.

Nalipay gayod si Carla sa iyang textmate kay gawas nga guwapo kini, tipo kuno niya. Apan, ang nakaproblema kay medyo langas ang tinan-awan. Kanunay kini mopasiplat sa mga butang sa balay.

Gamay lang ang panahon sa pagsultihanay, nagkasabot sila nga manuroy sila sa siyudad. Giagni si Carla sa iyang textmate nga manan-aw sila sa sine, manuroy sa mga dagkong mall ug uban pa.

“Pagka human nato suroy, Carl, mangaliggo kita sa dagat ug don’t you worry kay sagot ko ang lahat na ating magagastos,” pulong sa textmate. “So, prepare yourself kay manglakaw na kita.”

Nag-ilis si Carla sa iyang sapot samtang nagpabilin ang iyang textmate sa sala ug samtang didto si Carla sa iyang lawak, gikuha niini ang iyang mahal cellphone, ang iyang relo ug kuwentas nga diha niya gibilin sa lamesa unya milakaw ang iyang textmate dala ang tanan niyang butang. Pagtan-aw niya sa may bentana nakita niya ang iyang textmate nga duna diay kini’y kauban nga lalaki. Buot unta niyang sundon.

Haskang lagota ni Carla apan bisan unsaon niya paglagot, wala na ang iyang textmate. Busa, kutob lang siya sa paglagot ug ang sunod niyang gibuhat mao ang pag-adto sa presinto sa kapolisan aron ipatala ang nahitabo kaniya.

Dinhi nagmata siya sa kamatuoran nga dili ang tanan textmate makahatag kaniyag kalipay; hinuon mohatag kini’g daotang kasinatian sa iyang kinabuhi. (Kataposan)