Buotang Doktor

Gula 2

“Tana kay aron matabangan ka sa ubang gastohan sa imong amahan. Sigurado nga tabangan kang Tommy kay malooy man na sa mga pobre,” giingnan ni Dr. Gabriel si Liza nga daw nag-ukon-ukon pagtangdo.

Miuban gayud tuod si Liza kang Dr. Gabriel. Misakay sila sa kotse sa doktor ug dali ra sila nga miabut sa balay sa kongresista sa Barangay Guadalupe. Giswerte sila nga wala’y bisita si Tommy.

Human mapasabot ni Dr. Gabriel si Tommy sa panginahanglan ni Liza, igo ra nga miyango-yango si Tommy ug misulod sa lawak. Pagbalik gitunol kang Liza ang bandol nga kwarta.

Wala makatoo si Liza nga ingon niadto kadako sa kantidad nga ihatag sa kongresista kaniya. Wala siya makapugong sa paghilak tungod sa kalipay. Namalik sila pagsakay sa kotse sa doktor.

“Tan-awa, wala gayud ko mosipyat nga tabangan ka ni Tommy,” giingnan ni Dr. Gabriel si Liza. “Salamat gayud kaayo dok ha? Dili ko makalimot sa daku nimo nga natabang nako,” ni Liza pa.

Giihap ni Liza ang kwarta nga gihatag kaniya ni Tommy. Wala siya makatoo kay P25,000 ang tanan. “Giingnan nako nga kinahanglan ka og daku-daku nga kwarta kay kinahanglang operahan man ang imong amahan,” matud ni Dr. Gabriel.

Daw naibtan og tunok si Liza. Wala na siya maproblema sa panggasto sa mga tambal. Hangtud nga hingpit nga naalim ang iyang amahan ug nakagawas na kini sa ospital.

“Mogawas na kami unya dok?,” gisukna ni Liza ang doktor. “Mahimo na,” dali nga tubag ni Dr. Gabriel nga mitutok pag-ayo sa dalaga. “Mangayo diay ko nimo og contact number dok, pwede?” matud ni Liza.

Gikuot ni Dr. Gabriel ang iyang pitaka og gikuha ang usa ka calling card nga diha ang iyang ngalan ug contact numbers. Gitunol niya kini sa dalaga.

Nanglabay ang mga adlaw, samtang nag-round si Dr. Gabriel sa mga pasyente sa Ward 5, mitingog ang iyang message alert. Gikuha kini sa doktor ug nakapahiyom siya kay gikan ni Liza ang text message.

Nag-imbitar kini sa doktor sa iyang birthday inigka-Sabado. Sanglit off duty na man si Gabriel sa gabii, iya dayong gitubag si Liza ug gitangdo. “Sige anha ko, asa dapit ang inyo?” tubag sa doktor.

“Kuhaon lang tika Dok diha sa ospital kay aron dili ka matagbaw og pangita sa among balay,” matud sa dalaga. Pagka Sabado didto na tuod si Liza nagpaabot sa waiting area sa hospital nagpaabot sa doktor. (Sumpayan)