Kabilinggan

Alas siyete i medya sa buntag. Nanaug si SPO1 Richard Dagoc sa ilang balay kay moadto na sa estasyon sa polis sa ilang lungsod sa Prabupa. Angayan kaayo siya sa iyang uniporme. Mao gyud ning orasa iyang igikan padulong sa buhatan. Maglakaw ra man siya.

Kay duol ra man ang munisipyo sa ila. Kapin kun kulang, usa ka gatos ka metros lang ang gilay-on. Sanag ang panagway sa kalangitan sa iyang paglakaw.

Unya gisugat siya ni Meme nga nanghubag ang mata sa paghinilak ug nalaghaw ang tingog. Silingan ug kababata niya si Meme. Suod pa gyud kaayo kay asawa man siya ni Jack Tibon ig-agaw ni Richard.

“Tan-awa ra god ni Chard akong nadawat nga teks” ni Meme ngadto sa higala nga giatubang niya. Nagtunol og selpon sa kasugat. Niurong og lakaw si Richard. Gidawat ang selpon.

“Ayaw nag hilabti akong Mama ug si Jack. Kay malinawon na silang nag-ipon -- Gingging” mao ni mensahe nga nabasa ni Richard sa selpon ni Meme.

Tungod sa kasuod nila, si Richard ang sumbongan ni Meme sa tanan niyang problema. Mora sila’g managsoon kasuod. Tulo na ilang anak ni Jack ug Meme. Family drayber si Jack sa ginikanan ni Gingging. Stay-in panagsa. Pero sa weekends mopauli gyud. Sobra lima na ka tuig ang pag-alagad ni Jack sa managtiayong Aldwin ug Eleanor. Adunahan ang maong magtiayon. May dagkong negosyo sa ilang lungsod. May convenient store, restawran, ug mga paabangang apartment ug commercial complex.

Duha ka tuig nang nabiyuda si Eleanor human namatay iyang bana sa atake sa kasingkasing. Unya karon lang kabag-ohan wa pay tulo ka bulan, panagsa nalang mopauli si Jack sa ila. Adto na tigkatulganan sa usa ka bakanteng apartment nilang Eleanor. Apan bisa’g way nakitang dautang gibuhat, nabaniog na sa ilang lungsod nga nagpuyo sila’s Jack ug Eleanor.

Dalaga na si Gingging nga kamaguwangang anak ni Eleanor. Nikonsenter siya’s inahan kay biyuda na, wa may kabilinggan, niya pa. Apan ang iyang karelasyon ang may kabilinggan.

Katulo na sulonga ni Meme ang maong apartment. Iya ganing gibato usa ka sayong buntag sa ikatulong pagsulong. Wa nanggawas ang mga nagpuyo. Nagpakabutabungol sa hinagtok sa bato sa atop ug pinaka sa bongbong. Nangabuak gani ang diyelosi nga bintana.

“Ayaw nunti og krimen ang ilang gibuhat nga krimen. Kun gusto ka, kiha lang aron malinawon ang pagproseso sa imong reklamo” badlong ni Richard ngadtong Meme adtong buntaga sa pagpamato ni Meme sa apartment nga gikatulgan sa iyang bana ug kabit.

“Adunahan si Eleanor. Promenente iyang pamilya. Inila siya’s atong lungsod. Dili unta siya mag-ingon ana nga eskandalosa. Naa may daghang ulitawo o biyudo. Nganong tuyoan man gyud niya akong bana?!” ni Meme. Nitutok sa kaatubang.

“Sa akong bahin, kay di man gyud usahay kalikayan nga maibog ang bana sa laing babaye, di sab nako biyaan akong pamilya oy” ni Richard. Gitunol og balik ang selpon nga nahuman na niya’g basa ang mensahe.

“Unsa may buhaton nako ini?” ni Meme sa pagdawat sa selpon.

“Preserbaha nang mensahe. I-save ang text message. Kay mahimo na nimong ebidensiya batok sa imong bana ug kabit. Kana, kun mokiha ka’g kaso nga concubinage. Sa Binisaya pa, “panapaw” ni Richard. Nihana og lakaw.

“Sa ato pa, puwede ni nako ipa-blotter?” ni Meme. Nagsigi’g tan-aw sa mensahe sa selpon niya.

“Segurado,” ni Richard. Nakapahiyom.

“Karon dayon?” ni Meme. Niluta ang kahinam sa nawong.

“Puwede. Tana. Kuyo’g tas munisipyo” ni Richard. Nisugod og lakang.

“Unya mosugot lang ka nga imong ig-agaw makiha?” ni Meme.

Nitalikod ug nitupad og lakaw sa wala ni Richard.

“Ang balaod pareha ra nag negosyo. Way parentehay sa negosyo. Ang negosyo, negosyo. Kun manindag sari-sari imong ig-agaw, unya naa kay paliton, bayad gyud ka. Bisa’g ig-agaw. Di ka kaingon, libre ko gaw, kay ig-agaw man ta. Kun nakasupak ang tawo sa balaod, di kaingon ang pulis nga di siya dakpon kay ig-agaw. Bueno, naa say pulis ingon ana. Apan tarong ko nga pagkapulis. Mahadlokon ko sa balaod sa Diyos ug sa tawo” ni Richard.

“Mao ba?” ni Meme. Dako’g pahiyom. Ug nagkuyog sila padulong sa munisipyo. (Katapusan)