Sugilanong Legal Mogula matag Biyernes Pinakahipokrito

Domingo. Alas sayis sa buntag. Nag-abot sa highway duol sa Gaisano Super Metro ang duha ka abogado. Nagkadungan sila’g hike. Si Atty. Peter Doble padulong sa Maguikay. Nagsinilas lang siya. Angayan kaayo siya sa iyang short pants nga maong. Puti nga t-shirt ug baseball cap nga pula. Brown ang color sa iyang Ray Ban nga shades.

Layo pa, naaninaw na niya si Atty. Eddie Castro nga padulong sa Basak. Abuhon ang bulok sa gabardine nga short pants ni Eddie. Puti iyang rubber shoes nga Adidas. Asul iyang T-shirt. Ug itom iyang gisul-ob nga baseball cap. Itom ang bulok sa iyang shades nga ala Blues Brothers. Sa distansiya nga singkuwenta metros sa diin pa sila magkahinagbo, nagkailhanay na sila.

Duna sila’y sekreto nga disgusto sa usa’g-usa. Sa pagkakita ni Peter nga makahinagbo niya si Eddie, daghang nalitok niyang mga pulong batok sa naulahi sa iya lang hunahuna. “Nia man diay ning abogadong hambugero!” niya pa sa iyang hunahuna. May kasilo siya ining Eddie. Kay nag-atbang sila’g usa kaso. Unya giinsulto siya pag-ayo ni Eddie atubangan sa huwes. Matud pa ni Eddie nga angay displinahon ang abogado nga manunto lang sa ilang kliyente. Ilang kliyente, labi na’g datu, makabayad sa ilang serbisyo, dili sultihan sa tinuod. Bisag pildihunon ang kaso kay way ebidensiya, hala lang gyud og pasaka, kay makabayad man ang kliyente. Unya sa ngadtongadto, makaamgo lang ang kliyente nga gipanguwarta lang siya.

“I have an idea to propose to the Supreme Court, Your Honor, that the Rules of Court should be amended. It should include punishment of a lawyer who file cases without evidence. Once the case is dismissed, and the losing client is ordered to pay counterclaim to the prevailing party, the lawyer of the losing client should be ordered to pay half of the counterclaim. Because, first and foremost, the lawyer knows that his case is losing for lack of evidence. In the first place, he should not file any case without any proof of cause of action” matud ni Eddie, mga pulong nga wa gyud hikalimti ni Peter. Nihinay na’g surok ang dugo ni Peter. Gitutukan niya ang hapit na makahinagbo nga abogado nga seryoso sab nga nagtutok niya.

Trabaho man lagi sa abogado nga mopasaka og kaso basta may kliyente lang mobayad. May kliyente siyang gustong mamawi og yuta. Kay kuno heredero sa unang tag-iya. Unya ang yuta napanag-iya na sa kliyente ni Eddie. Dunay tax declaration ang klieyente ni Eddie. Ang kasong gipasaka ni Peter, ejectment. Papahawaon sa iyang kliyente ang kliyente ni Eddie sa iya mismong yuta. Way ebidensiya o dokumento sa pagpanag-iya ang kliyente ni Peter. Laway ray ebidensiya. Gihimoan la’g Affidavit ni Peter. Unya pinasikad sa maong affidavit, gipasaka ni Peter ang kaso. Mismo sa record sa Register of Deeds, DENR o Assessor’s Office nga magmatuod nga usa ka higayon sa nanaglabay’ng katuigan, naa sa ngalan sa apohan sa kliyente ni Peter ang yuta, wa gyuy ikapakita.

Grabe ang insulto nadawat ni Peter gikang Eddie. Ni Eddie pa, imbis nga iyang kliyente iyang panalipdan aron di makagasto sa kasong way dag-anan, iya hinuong gidasig, gibuhing dugo aron lang makagasto. “Hambugero!” igo ra gyung moingon si Peter batok ni Eddie. Apan lagi kay sumala sa professional code of ethics sa mga abogado, maghuyhoy sila, wa lang nakig-away si Peter ni Eddie. Nakasabot sab si Peter nga ubos ang pagtan-aw ni Eddie ngadto niya. Wa siya’y mahimo kay husto man si Eddie. Gani, na-dismiss ra ang kasong gipasaka ni Peter batok sa kliyente ni Eddie. Maayo gani kay wa ni-order ang huwes og pabayad sa counterclaim.

“Morning panyero! Health conscious sab diay ka” ni Eddie nga mapahiyumon dihang hapit na sila magkasayloay. “Morning panyero! Mao lagi. Kining magkatiguwang na ta. Angay na gyud nga magpasingot” ni Peter. Mapahiyumon sab. Mora siya’g tinuod gyud nga managhigala. Mao na ang mga abogado. Kamao motago sa ilang tinuod nga pagbati sa usa’g-usa. Maayo magpakaaron-ingnon. Pinakahipokrito. Nagsayloay lang sila nga daw bestfriends. (Kataposan)(Sa magbabasang gusto’g libreng konsulta, dad-a ning pahina sa opisina sa tagsulat. Iatol og Sabado sa buntag)