Mosawom sa dagat

Dear Tita Salie,

Just call me Tina, 43 years of age ug nagpuyo sa Lapulapu city. Bisan sa akong pangidaron dalaga lang gihapon hangtod karon.

Aduna ko’y uyab, Tita, tagoa lang siya sa pangalan nga Well, taga Iloilo City. Nasayod ko nga mahal kaayo ko niya bisan pa man kun sa text lang kami nagkauyab. Wala gyud ko magduhaduha pagsugot niya tungod kay mora man og sinsero gyod siya nga nakig-textmate nako. Ug tungod niini nakat-on usab ako sa pagmahal kaniya bisan ingon lang niini ang among communication.

Kining akong uyab adunay uyoan nga magsige og text ug tawag nako. Ug matud niya nga nahigugma siya nako. Pero wala gyud masayod ang akong uyab nga nagsige og text o tawag nako ang iyang tiyo. Mao nga nahadlok ko nga tingali kun sa kadugayan iya na unyang masayran.

Nahasol usab ako niining uyoan sa akong uyab kay matud niya nga kundili siya ang akog higugmaon mosawom kuno siya sa dagat ug dili na siya motunga. Ingon kuno niini kadako ang iyang paghigugma nako. Iya kunong pakamatyan ang iyang gugma.

Naglibog gyud ko, Tita, kun unsay akong buhaton. Palihog pasabta ko. Daghang salamat sa pagtagad.

-- Tina

Hello Tina,

Mohangyo lang ko nimo nga kun puwede lang unta ayaw intawon patuyoka ang imong kinabuhi diha lang sa celfon. Pabokara ang coverage sa imong kinabuhi ug ayaw ilimit dinha sa text or call kay aron dili ingon niana ang dagan sa imong hunahuna. Bisan kun ingon na niana ang pangidaron karon apan ayaw pagkawa sa paglaom, kay sa imong problema mora og desperada na gyud kaayo ka.

Ayaw pagtuo dayon sa ilang i-text kanimo. Tingali kun sa matag-text nimo ngadto nila o kun mo-text sila kanimo gikataw-an ka nila kay dali ra kaayo ka motuo. Unya ra tuohi ang ilang “I love you” kun nagkita na kamo. Walay problema kun igo ka lang naglingaw-lingaw sa pagpakig-text-text kanila, apan akong tambag kanimo ayaw usa seryosoha ang ilang isulti kanimo sa text, kay sama kanimo naglingaw-lingaw ra usab sila.

Pero kun seryoso gyud ka sa text, unya mahal gyud nimo ang imong boyfriend sa text, ilisi na lang ang imong sim-card aron dili na maka-text kanimo ang uyoan sa imong boyfriend. But, of course imong pahibaw-on ang imong uyab sa imong bag-o nga numero. Ug pasagdi ang iyang uyoan nga mosawom sa dagat kay wala kanay labot kun buhaton niya kana. Pero nagduda ko nga gibinuangan ka lang niya kay motuo ka man dayon sa iyang mga i-text kanimo.

-- Tita Salie