Mata sa Kasingkasing - Gula 139

“Imo nang desisyon, pwes, i-ikaw ang mag-igo. Pero...no hard feelings, ha. Di ko gustong magbaton ka’g kahiubos nako.”

“No hard feelings, Angeline. Ug salamat sa kahigayonan nga imong gihatag nga maka-uyab ko nimo. Di nako makalimtan ang maong kasinatian.

Ug mao na kadtoy kataposan nilang panagsulti. Matag adlaw magkita sila sa tulonghaan. Apan si Robert ingon sa naglikay kaniya. Motagad man hinuon kini kun dili gyud kalikayan nga magkaduol sila. Apan igo lang kining motimbaya, dili gyud molahutay sa pagpakigsulti kaniya.

Miabot ang kasal nila ni Regner ug Carmi. Mipauli gyud si Angeline sa Danao aron pagtambong sa kasal sa duha. Si Angeline maoy mitaod sa chord. Wala niya damha nga ang iyang kapares pagtaud ngadto sa gikasal mao si Christopher, ang iyang ex-boyfriend.

Human sa kasal, ang kinasal mipauli na ngadto sa balay sa taglakin-an diin didto gihikay ang mga pagkaon. Alegre kaayo ang paniudto tungod sa rondalya. Gihugopan ang kombera sa daghang mga tawo.

Si Christopher nakahigayon pagpakigsulti kang Angeline samtang nagpadayon ang sayawsayaw. -- Sumpayan pa