Mata sa Kasingkasing - Gula 138

“Gipamalandongan ko sa makadaghan kining butanga, Angeline,” nagkanayon si Robert. “Ug karon nga nakabaton na ko og igong kalig-on pagdawat sa masakit nga kamatuoran, bug-os na ang akong desisyon.”

“Nga-nganong nakadesisyon ka man og ingon niini?” Sukit ni Angeline.

“Tungod kay nasayod kong sukad pa sa sinugdan, wa ka magmalipayon sa atong relasyon tungod kay wa ka mahigugma nako. Nakasabot ko nga gidawat mo lang ang akong gugma tungod kay gusto kang makatabang nako sa pag-usab sa dagan sa akong kinabuhi.”

Wala makatingog si Angeline. Apan sa hilom, nakaingon siya nga husto ang tanang gipanulti ni Robert.

“Nasayod sab kong naningkamot kang makakat-on sa paghigugma nako,” matud ni Robert. “Pero lisod gyud tingaling tudloan ang imong kasingkasing pagdawat nako. Lisod gyud tingali kong higugmaon para nimo.”

“P-pasayloa ko, Robert,” mikurog og diyotay ang tingog ni Angeline.

“Okey lang. Nakasabot ko. Ug nasayod kong gilisdan ka sa atong relasyon nga wa ta magkahigugmaay sa usa’g-usa. Mao nga ning tungora, putlon na nato ang atong relasyon aron wa ka nay problema.” -- Sumpayan pa