Maayo lang sa bag-o pa

Dear Tita Salie,

Good day. Palihog tagoa lang ko sa pangalan nga Jean, 18 years of age ug taga Danao, Cebu.

Akong concern kabahin kini sa akong boyfriend, and of course, sa akong lovelife. Sobra na sa usa ka tuig ang among relasyon.

Sa una dihang bag-o pa lang kami nga nagkauyab halos kada adlaw makigkita siya nako. Kundili gani siya makakita nako manawag gyod dayon siya sa cellphone aron iya kong pahibaw-on nga dili siya makahimo sa pagpakigkita. Dili pa gani siya makontento sa text mao nga manawag siya. Usahay ka tulo siya manawag sulod sa usa ka adlaw.Ug tungod dali kaayong nitubo ang akong gugma ngadto niya. Kulang na usab ang adlaw kundili ko siya makita o kaha ikasulti sa phone. Mangita na gyod ko niya kay iya man ko nga gianad nga anaa siya kanunay.

Apan dili na man siya ingon kaagresibo karon. Nausab na siya ug mao kini ang nakaalarma nako, Tita. Panagsa na lang siya manawag ug panagsa nalang makigkita nako. Usahay dili pa kami magkaestorya kundili ako ang manawag niya.

Unsa kahay iyang buot ipasabot niini, Tita? Wala na kaha siya’y feelings ngari nako? Maglisod na baya ko sa pagpakigbulag niya kay love na gyod kaayo nako siya. Palihog pasabta ko. Magpaabot ko sa imong pagpasabot, Tita. Thank you and more power. -- Jean

* * *

Dear Jean,

Suwayi usab pagtan-aw ang nahitabo sa iyang kinabuhi karon kun nganong ingon siya niana. Dapat sa inyong panagkita magkumostahanay mo kun unsa nay nahitabo sa inyong life. Kay kasagaran mao kini ang mahitabo ngano magkaproblema sila sa ilang relasyon.

Kinahanglan gyod nga constant ang inyong communication, kun puyde matag-adlaw aron update kanunay ang usa’g-usa ug dili na matingala kun ugaling dunay mga kabag-ohan sa inyong tagsa-tagsa ka kinabuhi. Kay kun panagsa na lang kamo magkaestorya dili na ninyo sinati ang usa’g-usa, busa, matingala ka gyod nganong ingon na niini ang imong hinigugma. Dili na kamo magkailhanay sa usa’g-usa kay dili na man kamo sige og estorya. Mao gyod kini ang kasagarang nahitabo sa atong mga magtiayon karon. Kun kulang na ang oras alang kanila nga magka-estorya dinha mogawas gyod dayon ang problema ug wala nay pagsinabtanay.

Susama ra kini kun kita nagsubay sa dalan nga panagsa na lang nato maagian mora og masaag na kita ug maglisod na pagtultol sa padulngan kay ato namang nakalimtan. -- Tita Salie