Gasolinahan sa Escario daotan?

Ang mga hunahuna nga gipadayag dinhi iya ra sa tagsulat ug walay labot ang Banat News ug mga sakop niini.

Mayo 12 sa alas 10:00 pasado sa gabii, nagpatubil si Jove Tanudtanud sa Shell gasoline station nga anaa mahimutang sa dalan Escario ning dakbayan. Unang patubil niya balig P300. Nahibulong siya kay bisa’g gipaandar ug gipadagan na niya ang gimanehong MAZDA nga kotse, wala gyud mairog ang fuel gauge. Nagpabiling mipilit duol sa letrang ‘E’ o Empty.

Gumikan niini, mibalik siya sa gasolinahan ug gisudyaan ang tagdumala bahin sa iyang nasinati nga problema. Naatol nga wa diha ang tag-iya, team leader maoy miatubang ni Jove, diin igo lang siyang giingnan: “Basig ang gauge sa imong kotse maoy guba, Ma’am.”

Nainat ang kilay sa guwapang misis. Wala matago ang pagpamula sa iyang nawong dungan ang pagsalta’g diyotay sa iyang tingog: “Unsay guba? Kabag-o pa ining akong kotse, unya kasa pa gyud ang nagmintin, sayonsayonan lang ninyo’g ingon nga guba? Aber, usbi kunog tubil og P300 kay akong tan-awon kun di pa ba gihapon mairog ang gauge!”

Gitimbolan tuod sa pump boy. Mao gihapon ang nahitabo. Wa gyud molihok ang gauge. “Naaahhh, gauge gyud sa imong sakyanan ang daotan, Ma’am!” Komentariyo sa team leader.

Aron pagsusi kun guba ba gyud tinuoray ang gauge, miadto si Jove og laing gasoline station -- sa Petron, Banawa, diin nagpagasolina siya’g P1,000. Pastilan, pagpaandar niya sa makina, motaas bitaw na ang tudlo sa gauge ngadto sa tungatungang bahin sa letrang ‘E’ ug ‘F’, mikunot pag-ayo iyang agtang, uy! Ning puntoha, iya nang nahibaw-an kinsa ang guba?

Giadto na pud ni Jove ang Escario Shell Gasoline Station ug mireklamo nganong sa Petron nairog man ang iyang gauge, unya sa Shell, wa man gyud. “Basig daotan nang inyong pump hose?” Dugang sukna ni Jove.

Pastilan, wa gyud mausab ang tubag sa team leader: “Maayo man ni’g kondisyon among gasolinahan, Ma’am. Naa gyud sa gauge sa imong sakyanan ang deperensiya.”

Mao ba team leader? Mora’g panahon na tingali, da, nga sangpiton ta ang mga kadagkoan sa Energy Regulatory Board (ERB) aron tsek-apon kining gasolinahan sa Shell nga anaa mahimutang sa Escario kun patas ba kining mihatag sa ilang mga konsumidor og hustong sukod sa litro sa gasolina nga gibayran intawo’g mahal sa nanginahanglan. Basig hangin ray ibuga sa ilang pump imbes gas?

Mayor Mike Rama, amahan namo sa Sugbo, nindot unta kun kahataga’g dinaliang aksiyon kining problemaha. --