Gula 136
“Duna koy importanteng giatiman,” tubag sa ulitawo.
“Importanting giatiman? Mas importante pa ba kana sa imong pagtuon?” Wala kapugngi ni Angeline ang pagtungas sa iyang tingog.
Nanglingi ang mga lalaking nagdula og bowling dili layo kanila.
“Mas maayo tingaling mangita ta’g laing dapit nga magkasulti ta’g maayo,” misugyot si Robert.
Namiya sila sa sports center. Nanakay sila’g traysikol ug nagpahatod sa downtown. Misulod sila sa usa ka luhong kan-anan. Si Robert ang mi-order sa ilang pagkaon. Samtang nangaon, gisugdan nila ang panagkabildo.
“Unsay hinungdan sa kanunay mong pagpalta sa klase?” Gipangutana ni Angeline si Robert dihang naghinungatunga na sila sa pagpangaon.
“Personal nga hinungdan,” tul-id nga tubag ni Robert. “Pasabton ko ikaw sa tanan inigkahuman nato’g pangaon. Okey?”
Gitibawas nila ang pagpangaon.
“Karon suginli na ko, Robert,” apura ni Angeline human sa pangaon.
“Sure,” ni Robert. “Panahon nang masayod ka sa akong hukom.”
“U-unsay buot mong ipasabot?” -- Sumpayan pa