Gahum sa Kwarta

Hapon na nga miabot si Roderick dinhi sa dakbayan gikan sa Bohol. Nahukman man gud niya ug sa iyang mga igsoon nga ibaligya na lang ang ilang yuta didto sa Tagbilaran kay ania na man sila manimuyo sa dakbayan. Sanglit upat ra sila nga managsuon, tag kapin sa usa ka milyon ka pesos ang bahin nila sa P6.5 milyon nga halin sa yuta. Binandol nga tag-usa ka libo ka pesos ang gibayad sa nakapalit.

Miabot gayud og 16 ka bandol nga tagsa ka libo ka pesos ang bahin sa matag usa kanila. Gisulod kini ni Roderick sa gidala niya nga daan nga bag. Wala gani siya mahibaw-i nga nagdala’g daghang kwarta pagsulod niya sa SM City.

Sa tanto nga suroy-suroy ni Roderick sa mall, nalantawan niya ang usa ka promotion sa unahan nga nagbaligya og cellphone. Mahalon ang cellphone apan ang nakapadani ni Roderick mao ang mga promo girl. Pulos mga gwapa ang promo girls nga gigamit sa kompaniya aron mo-promote sa ilang produkto. Wala makasabut si Roderick sa iyang gibati, napugngan niya ang iyang pagginhawa dihang duol na siya sa maong mga gwapa nga babaye. Gawas nga mga gwapa, mubo kaayo ang sinena nga gisul-ob. Dihang duol na kaayo si Roderick, atul usab nga nanaug sa plataporma kadtong gwapa gayud kaayo nga promo girl. “Agoyy,” wala makapugong si Roderick sa paglitok sa maong pulong apan diha ra sa iyang huna-huna samtang gitutokan niya ang dapit sa punoan sa paa sa promo. Nagkuba-kuba ang dughan ni Roderick nga nagtan-aw sa maong babaye.

Milad-ok siya og laway. Wala makabantay ang babaye nga gisigihan diay siya’g tutok ni Roderick nga nagsul-ob og sunglasses. Nakahukom si Roderick nga magpasumangil nga mamili og selpon.

Gituyo ni Roderick nga adto moduol sa maong babaye aron mangutana kabahin sa ilang produkto. Tumong usab nga dunay laing customer nga miduol, usa ka ambongan nga lalaki.

Wala dayon tagda si Roderick sa gwapa nga promo. Ingon sa nahilaw tawon si Roderick apan wala lang niya kini panumbalinga. Nakabantay si Roderick nga walay tumong mopalit ang tawo nga nangutana.

Dunay laing customer nga miduol. Gituyo ni Roderick nga kusgon ang iyang tingog aron makadungog ang gwapa nga promo.

“Nindot ba kining klaseha sa selpon? Gusto unta ko nga mopalit og tulo kay hatagan nako ang akong pag-umangkon,” matud ni Roderick. Wala masayop si Roderick kay miduol tuod dayon kaniya ang gwapa nga promo girl. (Sumpayan)