Dear Tita Salie,
Have a wonderful day. Just call me Jean, 17 years of age. Taga Negros ko apan ania karon dinhi sa Cebu kay nangita og trabaho. Ug nia ko nagpuyo sa akong iyaan.
Samtang nagtrabaho ko dinhi, nakabaton ko’g hinigugma ug siya ang nagdasig kanako kanunay sa pagpanginabuhi. Kun duna koy mga problema ug kahiubos, siya gyod dayon ang anaa sa akong kilid aron pag-am-am kanako.
Karon akong namatikdan, Tita, nga mora og napul-an na man nako ang akong iyaan. Akong nasabtan nga lahi na ang ilang tinagdan nako. Busa, nakahunahuna ko nga mangita og kabalhinan aron mag-abang na lang ko. Total duna man koy sweldo, so dili nako maglisod sa akong kinabuhi dinhi bisan ako rang usa.
Apan ang akong boyfriend ni-offer nga magtipon na lang mi og puyo kay nag-boarding house man siya aron kuno gamay ra among gasto. Pero ang akong gikabalak-an kay kun moari ang akong mga ginikanan mahibaw-an gyod nila. Unya 17 pa man akong edad nahadlok ako unyag dunay mahitabo kanako, Tita.
Naglibog gyod ko karon kun unsay akong buhaton. Palihog pasabta ko. Daghang salamat sa pagtagad. -- Jean
* * *
Hello, Jean ug komusta? Tingali og igo-igo ra usab ang budget sa imong iyaan alang sa iyang pamilya mao nga usahay mora og mabug-atan siguro siya og gamay kay anaa ka apan nga makadugang sa gastohan. Ayaw lamang kahiubos sa imong iyaan kun usahay lahi ang iyang tinagdan nimo. Nasayod kana nga dili sayon ang kinabuhi karon, mao nga usahay init ang atong ulo kay daghan ang bayranan ug mahal pa gyod ang mga palaliton. Hinuon, magpasalamat ka niya tungod gidawat ka niya diha.
Before ka mangita og kabalhinan, nganong dili nimo suwayan nga mohatag ka og gamay’ng kwarta sa imong iyaan matag sweldo nimo isip tabang alang sa iyang mga gastohan. I’m sure that in this way moluag-luag ang iyang dughan kun mopakita ka og pagtabang.
Buhata kini sulod sa usa ka kabulan ug imong tan-awon kun aduna bay epekto. Kay alang kanako mas secured ka kun anaa ka sa poder sa imong iyaan. Apan kun sa imong tan-aw walay kausaban ang pagtagad sa imong iyaan, mas maayo seguro kun mangita ka og laing kapuy-an. Pero ayaw kasugot sa gi-offer sa imong boyfriend nga magtipon nalang mo og boarding house aron malikayan ang problema kay tingali og dili ninyo kapugngan ang inyong kaugalingon. Bata ka pa, Jean, ug luoy ka kun mahitabo unya ang dili pa angayan mahitabo. Ayaw usab tagai og problema ang imong ginikanan. Kay sa panahon nga masayran nila nga nagtipon mo og gipuy-an sa imong bf dili na sila mahimutang ug magsige na lang unya sila og hunahuna nimo. -- Tita Salie