Pagkaugma, wala motungha si Robert sa ilang eskuylahan. Nahisagmuyo si Angeline sa pag-absent sa ulitawo. Duna ra ba unta siya’y gustong pakigsultihan niini. Gusto siyang masayod kun nganong wala na gayod mobisita ang ulitawo didto sa gipuy-an niyang boarding house.
Sa tulonghaan sab kaswal kaayo ang ilang pagtinagdanay kun magkaduol sila. Mora’g dili gusto si Robert nga makigsandurot kaniya. Nakasabot si Angeline nga gustong modistansiya si Robert kaniya.
Pagkasunod adlaw wala gihapon motungha si Robert. Mi-absent gihapon kini sa misunod pang mga adlaw. Dihang natapos ang usa ka semana nga wala gyud magpakita si Robert sa tulonghaan, nagsusi na si Angeline.
Adlaw’ng Sabado, miadto si Angeline sa gipuy-an ni Robert sa Manga District. Nakatultol na siya sa balay nilang Robert kay nahikuyog man siya niadtong paggawas sa ulitawo gikan sa ospital ug mipauli na ngadto sa ilang gipuy-an. Nahinumdom pa siya sa lokasyon sa balay nila.
Apan wala si Robert sa iyang paghiabot. Ang inahan niini maoy gikasulti ni Angeline. -- Sumpayan pa