Man hater

Misamot ang kakulba ni Salie. Misantop sa iyang hunahuna kadtong sulat nga iyang nadawat didto sa opisina sa Sunlight Publishing - gitagik kadto sa ginunting nga mga titik gikan sa mantalaan. Dili ba kaha si Allan ang nagpadala sa maong mensahe kaniya? Nagpasabot ba kini nga si Allan ug ang misteryosong tawo usa ra? Nakapangutana siya sa iyang kaugalingon.

Ang halawom nga pagpalandong ni Salie napakgang og kalit dihang may kamot nga mitugpa sa iyang abaga. Ug miliso nga nahaigking si Salie.

“May gipangita ka ba? matud ni Allan nga nagbarog sa iyang luyo ug nagtan-aw sa iyang gibuhat.

Ulahi na aron iyang tagoan ang magasin. Nakita na kini ni Allan. Mihait ang tinan-awan sa ulitawo ngadto kaniya.

Gikuha ni Allan ang magasin nga gigunitan ni Salie Valle. Gibati nag kahadlok ang dalaga sa tinan-awan sa lalaki kaniya. Natugkad niya nga wala kini makagusto sa iyang gibuhat nga pagpangutingkay sa magasin niini. Gihinay pagbutang ni Allan ang mantalaan ilawom sa center table apan ang mga mata niini wala ibulag kang Salie. Daw nagtuyok ang kalimutaw sa lalaki nga mitutok kaniya -- masabot nga naglagot kini sa dalaga.

“May nakita ka ba sa maong magasin?” nangutana si Allan.

“W-wala...” namakak si Salie.

Wala motingog si Allan. Gitutokan siya niini nianang tinan-awan nga daw nagatugkad kun nagsulti ba siya sa tinuod. Wala makaharong si Salie sa tinan-awan sa lalaki. Miduko siya. -- Sumpayan pa