Man Hater

Gula 125

Mibalik dayon si Allan sa awto. Gipaarangkada niya ang sakyanan. Misulod sila sa gate ug miurong ang Nissan Altima 2.0 atubangan sa pultahan sa balay.

Miuna pagkanaog si Allan ug gibuksan ang pultahan sa sakyanan sa tungod ni Salie.

“Salamat,” ni Salie dayong kanaog.

“Okey lang basta ikaw,” mitutok ang ulitawo kaniya. Milingiw si Salie.

Gitak-opan una ni Allan ang gate nga puthaw. Dayon nanglakaw sila paingon sa balay ni Allan nga nagtungkawo niadtong dapita.

“Ikaw ray nagpuyo dinhi?” ni Salie pagkamatikod nga nagngiob ang tugkaran ug sulod sa balay ni Allan.

“Sukad namatay si Papa Ludivico nag-inusara na lang ako kanunay dinhi.”

Mihunong sila paghitungod sa pultahan. Si Allan may gikuot sa bolsa sa atubangan sa iyang karsones nga maong. Paglugwa sa gihulbot niyang kamot dihadiha nadala ang key holder nga gikapyotan sa daghang mga yawe. Ang usa sa mga yawe iyang gipasok sa yawehanan ug giliso kini. Unya iyang gihinay pagtukmod ang palid sa pultahan.

Misulod si Allan. Gihiram ang switch sa sugang dagitabnon diha sa bungbong ug gi-on. Mibaha ang kahayag sa palibot sa sala.

“Dali na,” ni Allan pagkamatikod nga wala mosunod si Salie kaniya. Nagpabilin ang dalaga nga nag-ung-ong didto sa pultahan.

Misulod na si Salie. Maukitong gisuhid sa dalaga ang palibot sa balay ni Allan. Yano lang ang arrangement niini. Sa usa ka bahin sa bungbong sa sala, sa likod sa sopa, nagbitay ang dagkong mga kuwadro sa lainlaing mga hulagway sa tawo, mga butang ug maanindot nga mga talan-awon. -- Sumpayan pa