Walay lingaw

Dear Tita Salie,

Maayong adlaw. Hinaut nga dili ka mapul-an sa imong column dinhi sa Banat News kay daghan pa kaayo kami nga magpatabang kanimo.

Usa ako ka inahan apan subo kaayo nga hunahunaon nga dili ako asawa. Sa Mandaue ko nagpuyo ug kanunay lang anaa sa balay nag-atiman sa bata. Daghan kaayo kaming mga inahan nga gusto untang dunay trabaho o kalingawan sa kinabuhi aron usab duna kami income nga among magasto sa among pamilya. Daghan kaayo ang mga inahan nga wala’y laing trabaho gawas sa pag-atiman sa mga bata. Apan gusto nga dunay makat-onan, Tita.

Gusto namo nga makahimo kami og livelihood project alang kanamong mga inahan. Aron malingaw mi ug duna say makat-onan ug makakwarta pa gyod mi. Aron sa ingon niini dili masayang ang among oras. Kay human namo og hatod sa among anak didto sa eskuylahan wala na kami laing mabuhat, ang uban magsige og tabi, adunay magpunay og text ug ang uban mouli sa balay ug manglaba.

Unsa may akong buhaton, Tita? Asa man ko moduol kabahin sa akong problema? Unsa may akong apilan nga matubag ang akong gikinahanglan. Daghang salamat and more power.

* * *

Maayong adlaw sa tanan ilabi na sa mga inahan nga kanunay’ng bisi sa pag-asikaso sa ilang mga anak. Siguro usab abuton kita og kalaay usahay kun mao lang kini kanunay ang atong balik-balikon paghimo kada adlaw ang pag-atiman sa kabataan. Ug natural lamang nga makahunahuna kita og pangita’g kalingawan aron usab kita makatabang sa atong bana sa pagpangita og kwarta labina kun ang atong budget sa panimalay kanunay’ng kulang kun kita muadto sa atong komprahanan alang sa mga gamiton sa atong mga anak ug sa panimalay.

Mas maayo gyod unta kun samtang kita nagpaabot nga mahuman ang klase sa atong mga anak, duna kita’y gibuhat nga puyde natong kakitaan og bisan gamay lamang.

Puyde kamo muadto sa Tesda ug mag-inquire kamo sa ilang mga gipang-offer nga mga short team course sama sa cooking pananglitan. Puyde ra kamo moeskuyla nga walay bayad. Ang inyo lamang gasto mao ang mga ingredients alang sa inyong lutoon. Puyde ra usab kamo makahangyo kanila nga magpa-workshop kamo sa inyong barangay aron sila ang taga Tesda mismo ang muadto sa inyong lugar. Magpili lamang kamo kun unsay inyong gustong makat-onan. -- Tita Salie