Man hater

“Areglado,” ni Allan pa. Usa ka langyaw’ng pahiyom milabhag sa iyang panagway. Kun namatikdan pa ni Salie kadtong lahing kaham-ot ug kinidlap sa mga mata sa lalaki, tingali magpanagana na siya pagkuyog niini. “Asa man ta moadto?” nangutana si Salie dihang nagsubay na ang ilang gisakyan sa dalan P. del Rosario.

“Sa akong balay,” tubag ni Allan nga ang mga mata didto sa dalan nga ilang gisubay. “Gusto ko nga makita mo ang akong gipuy-an.”

Nahilom si Salie makadiyot. Duna siya’y gihunahuna. Apan ang maong hunahuna nahisama sa aso nga nahanaw nga gidagpas sa makusog nga hangin. Mipasulabi ang iyang kalagot ni Yuri.

“Pero kun di ka gusto mahimong di kita molahos didto.”

“No. It’s alright, Allan.” Pag-abot sa usa ka eskina, miliko ang ilang gisakyan ug mao nay gisubay ang halapad nga Osmeña Boulevard. Usa ka patrol car nga kusog nagdagan mihana pag-overtake kanila. Mihatag og lugar si Allan. Sa hunahuna ni Salie misantop gilayon si Yuri. Sa paghitungod sa maong sakyanan kanila, gilili sa dalaga kun usa ba si Yuri sa mga sakay niini. Apan wala si Yuri. Tulin nga misaylo ang patrol car ug kadali rang nakauna kanila.

Nakamatikod si Allan sa dalaga. “Nahinumdom ka na sab niya?”

Wala motubag si Salie. Si Allan nakapanglingo nga ang konsentrasyon gibubo sa iyang pagmaneho. Wala na nila makita ang patrol car didto sa unahan.

Tungod sa kahuot sa trapiko mikabat gayod ug bayente minutos ang ilang pagsakay una pa mahiabot sa Banawa. Misubay ang ilang gisakyan sa 3rd Street sa Whitehills Subdivision. Wala magtimik si Salie. Mihunong ang ilang gisakyan tungod sa gate nga puthaw nga may numerong 4-13. Nanaog si Allan. Gibuksan niya ang dakong pultahan aron makasulod ang sakyanan. Sumpayan pa