Ang kaisog

Gula 7

Giagbayan ni Rodel si Glenda samtang sila naglakaw paingon sa giparkingan sa sakyanan. Sanglit didto sila naka-park sa basement 2, mingaw ang maong dapit. “Mora gayud ko og nahubog Rodel,” giingnan ni Glenda ang bag-o niyang boyfriend.

Gipaandar ni Rodel ang makina sa kotse. Gipaandar usab niya ang airconditioning unit sa sakyanan. Tinted ang sakyanan ni Rodel mao nga dili gayud sila makita sa sulod kun tan-awon gikan sa gawas.

“Salamat kaayo nga gisugot ko nimo Glen,” matud ni Rodel. Midip-ig kaniya si Glenda. Miginhawa’g lawom si Rodel ug gidikit niya ang iyang nawong ngadto sa nawong sa dalaga.

Anam-anam nga nagtagbo ang duha ka masi’g nila ka mga ngabil. Sa unang higayon nadimdim ni Rodel ang katam-is sa mga ngabil sa dalaga. Lumoy kaayo ang mga ngabil sa dalaga.

“I love you Rodel,” wala makapugong si Glenda paglitok sa tulo ka sagrado nga pulong kay inanay’ng gituhop siya sa nagkainit niya nga pagbati sa padayon nila nga pagparayganay ug ni Rodel.

Ingon usab diay niini ang gibati ni Rodel samtang padayon sila nga nagparayganay. Bugnaw kaayo ang aircon sulod sa sakyanan apan wala kini makahimo pagpabugnaw sa nagkainit nilang mga pagbati.

“I love you Glenda,” hagawhaw ni Rodel ngadto sa iyang girlfriend. Gituhop na gayud sa kainit sa pagparayganay ang duha ka maghigugmaay. “Ayaw kabalaka Glenda, andam ko nga mangasawa nimo,” giingnan ni Rodel si Glenda.

Dayon gihapohap ni Rodel ang kalawasan ni Glenda nga maoy nakapasamot sa kaagresibo sa dalaga sa ilang pagparayganay. “Glenda, ayaw kahadlok, mamalhin ta og laing lugar,” matud ni Rodel.

Wala magtingog si Glenda nga migakus ni Rodel. Gipadagan ni Rodel ang kotse ug migawas sila sa basement parking. Paggawas nila sa parking area, diha pa nila masayri nga kusog diay kaayo ang uwan sa gawas.

Mideritso sila sa usa ka motel sa V. Rama Avenue. “Rodel ayaw baya ko’g pasagdi ha?” paraygon kaayo si Glenda kang Rodel dihang nakasabot siya sa tumong sa iyang boyfriend.

Gisaw-an nila ang makabuhong nga kalipay didto sa mabugnaw’ng lawak sa motel. Human sa matam-ison nilang kumbati sa ibabaw sa kama, gihapuhap ni Glenda ang iyang boyfriend nga opisyal sa kapolisan.

“Abtika nimo manguot uy, labaw pa man ka adtong mangunguot nga imong nadakpan kaniadto nga nanguot sa akong pitaka,” komedya ni Glenda kang Inspector Rodel Sigue. (Kataposan)