Dili mohatag

Dear Tita Salie,

Have a wonderful day. Tagoa lang ko sa pangalan nga Jojo, usa ka minyo, 26 years of age ug duna nay usa ka anak.

Nagkalagyo mi sa akong asawa dihang nakakita siya og trabaho didto sa Danao, sa Mitsumi. Nalipay na lang unta ko kay nakasulod na siya og trabaho ug duna nay income ang among pamilya. Wala siya mag-ulian sa among balay kay layo man kaayo ug sayang usab ang pamasahe. Busa bisan kun mingaw ako na lang giantos ug didto siya mag-ulian sa balay sa iyang mama.

Apan taudtaod na man siyang nagtrabaho pero wala man gyud siya makahatag alang sa among konsumo matag adlaw, Tita. Naglisod gyud ming duha sa akong anak kay wala pa man koy trabaho. Ug maglisod usab ako sa pagpangita og trabaho kay anaa man ang among anak ug gamay pa kini ug kinahanglan pa nga bantayan.

Wala na gyud ko kasabot sa among kahimtang karon nga unta kasado man kami. Dili nako masabtan nganong ingon niini ang akong asawa, Tita.

Palihog pasabta ko sa angay nakong buhaton. Gusto unta ko nga magkabalik ang among malipayong pagpuyo kay aduna na mi anak. Daghang salamat, Tita Salie, and more power.

* * *

Dear Jojo,

Dili nako makuha ang hinungdan kun nganong nakaako ang imong asawa sa pagbaliwala kaninyong iyang mga minahal sa kinabuhi. Imposible usab kun wala gyud siya mingawa sa inyong anak. Kay ang usa ka inahan dili gyud kini mahimutang kundili makita ang iyang anak. Mangita gyud kini og paagi aron iyang magakos ug mahagkan ang bata.

Wala usab nimo gisulti kun aduna bay panag-away nga nahitabo tali kaninyong duha nga maoy hinungdan sa wala niya pagpakabana kaninyo. Wala nimo gisulti kun wala ka ba mauyoni sa iyang pamilya nga maoy posibleng hinungdan ug wala na papaulia ang imong asawa diha sa inyong pinuy-anan.

Mas maayo seguro, Jojo, nga imong susihon ang imong asawa didto sa iyang gitrabahoan, kun maglisod ka pagpakigkita kaniya didto sa Mitsumi puyde nimo siya hulaton didto sa balay sa iyang ginikanan kun atoa man siya didto mag-ulian matag out niya gikan sa iyang trabaho.

Imo siyang pakig-estoryahan kun nganong wala na siya magpakita kanimo ug nganong wala siya’y suporta nga gihatag diha kaninyo. Ikaw gyud personal ang muadto sa Danao aron imong mahibaw-an ang kamatuoran kun unsa gyud ang hinungdan. -- Tita Salie