Gula 127
“Hinaut nga ang maong kiss dili maoy una ug kataposan, Angeline,” nagkanayon si Robert nga daw tulogkaron og sinultihan.
Wala motingog si Angeline. Naluoy siya kang Robert. Apan kutob ra diha. Wala nay pagbati nga labaw pa niana. Gitudloan na niya ang iyang kaugalingon aron makakat-on sa paghigugma kang Robert apan nagpabiling manhid ang iyang kasingkasing. Naglagot na gani siya sa iyang kaugalingon kun nganong si Erik pa gihapon ang iyang gihigugma.
Nagsingabot na ang pasko. Nagplano si Angeline nga mobakasyon sa Danao. Gimingaw na siya sa iyang mga ginikanan ug igsuon nga dugay nang wala niya makita tungod sa iyang pag-eskuwela sa Tagbilaran.
Human sa prelim exam sa second semester, nangandam na si Angeline sa iyang pagbakasyon ngadto sa ilang lungsod sa Danao. Gipahibalo niya si Robert sa iyang planong pagbakasyon.
“Kanus-a ka mobalik?” Nangutana si Robert.
“Human sa bag-ong tuig,” laktod nga tubag ni Angeline.
“Pag-ayo-ayo.”
“Salamat.” -- Sumpayan pa