Man Hater

Gula 120

Mikilab ang mga gutlo. Alas siyete na, apan si Yuri nga iyang gipaabot wala gayod motunga. Wala gani bisan anino na lang ni Yuri nga mipatim-aw.

Gigamhan ang kahiladman ni Salie sa tumang kalagot. Misantop sa iyang hunahuna nga malagmit giindiyan siya ni Yuri. Mibalik siya sa kusina nga naglungotlungot ang buot. Wala sa hunahuna nga milingkod ang dalaga sa atubangan sa lamesa. Gitutokan niya ang mga pagkaon nga gitabonan ibabaw sa lamesa. Ug mao na lamay iyang naamgohan ang pagpanaligdig sa mga luha sa iyang mga mata ug naghimo’g sapasapa sa iyang kaapingan.

Mihinay pagtindog si Salie, bug-at ang mga tiil nga milakang paingon sa iyang kuwarto. Milingkod siya sa ngilit sa iyang kama. Wala tuyoa, napantok ang iyang panan-aw sa ibabaw sa gamay’ng lamesita sulod sa maong lawak. Miukob ang iyang panan-aw sa tape sa kantang Power of Love nga gihatag ni Yuri kaniya. Iya kining gitutokan pag-ayo.

Gikawhat ni Salie ang tape gikan sa ibabaw sa lamesita. Iya kining gipasok sa cassette recorder ug gipatugtog. Maduloton siya nga namati sa mga linya sa maong kanta nga nagkanayon.

The whisper in the morning/Of Lovers sleeping tight/Are rolling bylike thunder now/As I look in your eyes.

I hold on to your body/and feel each move you make/ Your voice is warm and tender/A love that I could not forsake.

Wala na makapugong si Salie sa kaugalingon samtang naminaw sa maong awit. Gibuhian niya ang way tihiktihik nga paghilak. Gipukpok niya ang kama, ug dihang natagbaw na, ang iyang kaugalingon na usab ang iyang gipahimungtan. Gilangkat niya ang gisul-ob nga sinina. Pagkabitlak niini dihadiha nadayag ang bus-ok niyang dughan.

“Ang tanang pulong nga gilibkas sa maong awit ipahinungod ko kanimo.” Nahinumdom si Salie sa gisulti ni Yuri niadtong higayon nga gibilin niini ang tape sa maong kanta sa pultahan sa balay nga iyang gipuy-an. -- Sumpayan pa